АНУ-ын “Boeing” компани БНХАУ-д нийтдээ 500 орчим нисэх онгоц худалдах талаар хэлэлцэж байгаа тухай “Bloomberg” агентлаг эх сурвалжийг эш татан мэдээлжээ.
Энэ мэдээ нийтлэгдсэний дараа компанийн хувьцааны ханш арилжаа эхлэхээс өмнө 2 хувиар өссөн байна. Хэрэв хэлэлцээ амжилттай болж хэрэгжвэл, энэ нь АНУ-ын Ерөнхийлөгч Дональд Трампын 2017 онд Хятадад хийсэн айлчлалаас хойших хамгийн том хэмжээний худалдан авалт болох аж.
Хэлэлцээний хүрээнд авч үзэж буй асуудлууд:
- Захиалах онгоцны төрөл, загвар
- Нийлүүлэлтийн хуваарь
- Худалдааны хэлэлцээрийн хүрээнд онцгой ач холбогдолтой нөхцөлүүд
“Boeing” компанийн зүгээс уг мэдээлэлд тайлбар өгөхөөс татгалзсан гэж “Reuters” уламжилжээ.
Хоёр орны худалдааны хурцадмал харилцааны улмаас сүүлийн жилүүдэд “Boeing”-ийн Хятад дахь захиалга зогсонги байдалд орсон. Гэвч Хятадын тал дотоодын агаарын тээврийн компаниудтайгаа хамтран “Boeing”-ийн онгоцонд тавих шаардлагуудыг зөвшилцөж эхэлсэн нь уг хэлэлцээрийг урагшлуулахад чухал алхам болж байна.
Өмнөх томоохон захиалгууд:
- Энэ оны эхээр Ерөнхийлөгч Д.Трампын Ойрх Дорнодын айлчлалын үеэр “Qatar Airways” нийт 160 ширхэг онгоц захиалсан.
- Мөн Саудын Арабт хийсэн айлчлалын үеэр “AviLease” компани 20 ширхэг Boeing 737 MAX онгоц захиалжээ.
Ийнхүү Хятадад хийхээр төлөвлөж буй 500 онгоцны захиалга нь “Boeing”-ийн хувьд дэлхийн хоёр дахь том агаарын тээврийн зах зээлд дахин хүчтэй эргэн ирэх стратегийн ач холбогдолтой алхам болж байна.
