Монгол Улс батлан хамгаалах салбартаа түүхэн алхам хийж, анх удаа дотооддоо сум үйлдвэрлэж эхэлснээ Батлан хамгаалах яам албан ёсоор мэдээллээ.
Турктэй хамтын ажиллагааны үр дүн
Энэхүү үйлдвэрийг Бүгд Найрамдах Турк Улсын “MKE” корпорацтай байгуулсан гэрээний дагуу тоног төхөөрөмжөөр бүрэн хангаж, угсралт, тохируулгын ажлыг дуусгасны дараа ашиглалтад оруулсан байна. Ингэснээр Монгол Улс сум үйлдвэрлэлийн технологийг нутагшуулж, бие даасан үйлдвэрлэл явуулах боломжтой болсон нь онцлог үйл явдал болж байна.
Дотоодын хэрэгцээг хангах чухал ач холбогдол
Үйлдвэрийн үйл ажиллагаа эхэлснээр Зэвсэгт хүчний сургалт, бэлтгэлд шаардагдах сумыг дотоодоос хангах боломжтой болж байна. Мөн төрийн цэргийн болон үндэсний аюулгүй байдлыг хангах тусгайлсан чиг үүрэг бүхий байгууллагуудын хэрэгцээг хангах стратегийн ач холбогдолтой юм.
Цэргийн технологийн хөгжилд шинэ шат
Сум үйлдвэрлэлийн үйлдвэр нээгдсэнээр Монгол Улс цэргийн стратегийн хэрэглээг гадаад улсаас хараат бус байдлаар хангах нөхцөлийг бүрдүүллээ. Мөн энэ нь инженерийн туршлага хуримтлуулах, цэргийн технологийн салбар дахь өөрийн гэсэн Нөү-Хау бий болгох үндэс болж байгааг Батлан хамгаалах яам онцоллоо.
