2025 оны есдүгээр сарын 30-ны байдлаар алтны ханш огцом өсөж, түүхэндээ анх удаа нэг унц нь 3800 ам.доллараас давлаа. Энэ нь АНУ-ын бодлогын хүү буурах хүлээлт, засгийн газрын үйл ажиллагаа түр зогсох эрсдэл, дэлхийн геополитикийн хурцадмал байдал зэргээс шалтгаалан хөрөнгө оруулагчид найдвартай актив руу хошуурч эхэлснээр тохиосон өсөлт юм.
Алтны ханшийн өсөлтийн гол шалтгаан
Даваа гарагийн 14:00 цагийн байдлаар алтны үнэ 1.9 хувиар нэмэгдэж, унц нь 3,829.63 ам.долларт хүрсэн байна. “High Ridge Futures” компанийн металлын арилжаа хариуцсан захирал Дэвид Мегерийн хэлснээр, АНУ-ын засгийн газрын үйл ажиллагаа түр зогсож болзошгүй гэсэн болгоомжлол нь алтны ханшийг өсгөсөн гол хүчин зүйлсийн нэг болжээ. Үүнээс гадна Оросын Батлан хамгаалах яам Украины Донецкийн Шандриголово тосгоныг цэргийн хяналтдаа авснаа мэдэгдсэн нь геополитикийн эрсдэлийг улам нэмэгдүүлсэн байна.
Энэ оны нийт өсөлт
Бодлогын хүү буурах магадлал өндөр байгаа энэ үед алтны үнэ он гарсаар нийтдээ 43 гаруй хувиар өсөөд байна. Өнгөрсөн баасан гарагт зарлагдсан АНУ-ын хувийн хэрэглээний зардлын үнийн индекс таамаглалтай нийцсэн нь Холбооны нөөцийн сан ирэх 10 болон 12 дугаар саруудад бодлогын хүүгээ бууруулах боломж нэмэгдэж буйг харууллаа.
Бусад үнэт металлын ханшийн өөрчлөлт
- Мөнгөний үнэ 2 гаруй хувиар өсөж, унц нь 47 ам.доллар болж, сүүлийн 14 жилийн дээд түвшинд хүрэв.
- Цагаан алтны ханш 1.5 хувиар нэмэгдэж, 1592.65 ам.доллар болж, 12 жилийн дээд амжилтаа шинэчилсэн байна.
- Харин палладийн үнэ 1.1 хувиар буурч, унц нь 1255.61 ам.доллар болжээ.
