Монголын багийн бэлтгэл ба хамтын ажиллагаа
Италийн Милан, Кортина хотуудад хөшгөө нээх XXV өвлийн олимп эхлэхэд ердөө 128 хоног үлдээд байна. Энэ наадамд Монголын баг тамирчид биатлон, гүйлтийн цана, тэшүүр, уулын цанын төрлүүдэд эрх авахын төлөө өрсөлдөж буй.
Монголын үндэсний олимпын хороо (МҮОХ) болон “Гоёл Кашмер” компани хамтран ажиллаж, Монголын багийн тамирчдыг олимпод өмсөх ёслолын хувцсаар хангахаар боллоо. Өнгөрсөн долоодугаар сард МҮОХ, Биеийн тамир, спортын улсын хороо хамтран баг тамирчдыг хувцас, хэрэгслээр хангах компанийн сонгон шалгаруулалт, загвар дизайныг батлах ажлын хэсгийг байгуулсан. Нээлттэй сонгон шалгаруулалтын дараа “Гоёл Кашмер”-ын бүтээлийг эцсийн байдлаар сонгожээ.
Үндэсний өв ба орчин үеийн загвар
Олимпын нээлт, хаалтын ёслолын хувцас нь тухайн улсын түүх, соёл, уламжлал, орчин үеийн хөгжлийг харуулдаг бэлгэдэлтэй. Тиймээс энэ удаад монгол тамирчид үндэсний өв уламжлалыг орчин үеийн загвартай хослуулсан өвөрмөц хувцастайгаар Миланы цэнгэлдэх хүрээлэнд алхах гэж байна.
