Засгийн газрын шинэ тооцоолол юу хэлэв
Токио болон түүний ойр орчмын бүс нутагт ойрын хэдэн арван жилд хүчтэй газар хөдлөлт болох магадлал өндөр байгаа бөгөөд ийм нөхцөл үүсвэл 18 мянга орчим хүн амь насаа алдаж болзошгүйг Японы Засгийн газраас өнөөдөр танилцуулсан хохирлын тооцоолол харуулжээ.
7.3 магнитудын хувилбар, 2013 оны тооцоотой харьцуулбал
Токиогийн төвийн өмнөд хэсэгт 7.3 магнитудын хүчтэй газар хөдлөх хувилбараар гаргасан хамгийн сүүлийн тоон мэдээлэл нь 2013 оны өмнөх тооцооллоос 20 орчим хувиар буурсан байна. Үүнийг газар хөдлөлтөд тэсвэртэй барилга байгууламжийн сайжруулалт, мөн гал түймрээс урьдчилан сэргийлэх арга хэмжээг эрчимжүүлсэнтэй холбон Засгийн газрын ажлын хэсэг тайлбарлажээ.
Эдийн засгийн хохирол ч мөн буурсан дүнтэй гарчээ
Хамгийн таагүй нөхцөл байдал үүсвэл эдийн засгийн нийт хохирол 82.6 их наяд иен буюу 530 орчим тэрбум ам.долларт хүрнэ гэж тооцсон нь өмнөх үнэлгээн дэх 95 их наяд иенээс багассан үзүүлэлт боллоо. Мөн Засгийн газар Токио болон түүний ойр орчимд ойрын 30 жилийн хугацаанд 7 магнитудын хүчтэй газар хөдлөлт болох магадлал 70 орчим хувьтай гэж үзэж байна.
Хамгийн эрсдэлтэй хувилбар: өвлийн орой, салхитай үед
Судалгаагаар өвлийн улиралд оройн цагаар 28.8 км/цагийн хурдтай салхитай үед газар хөдөлбөл хамгийн таагүй нөхцөл бүрдэхээр тооцоолжээ. Энэ тохиолдолд Токио болон ойролцоох дөрвөн мужид хүний амь нас өндөр эрсдэлд орж болзошгүй бөгөөд зөвхөн Токиод л гэхэд нийт эндэгдэж болзошгүй хүмүүсийн 40 гаруй хувь нь буюу 8000 хүн амиа алдах магадлалтайг тогтоосон байна.
