Хятадын судлаачид хүний сэтгэл хөдлөлийг ойлгож, түүнд нийцсэн байдлаар хариу үйлдэл үзүүлэх чадвартай, хиймэл оюун ухаанд суурилсан панда робот бүтээжээ. Ань-ань хэмээн нэрлэсэн энэ роботыг Шиань Жяотун–Ливерпулийн их сургууль болон “Mind with Heart Robotics Co Ltd” компани хамтран хөгжүүлж, ахмад настан, тусгай хэрэгцээтэй хүүхэд, сэтгэл зүйн эмгэгтэй хүмүүст сэтгэлзүйн дэмжлэг үзүүлэх зорилго тавьсан байна.
Ань-ань энэ онд Лас Вегаст болсон “CES Innovation Awards” үзэсгэлэнд хиймэл оюун ухааны ангиллаар шагнал хүртэж, олон улсын технологийн салбарын анхаарлыг татав.
“Бусдыг ойлгох” чадварт төвлөрсөн хиймэл оюун
Энэхүү роботын гол онцлог нь судлаачдын нэрлэснээр “эмпати” буюу бусдын сэтгэл хөдлөлийг ойлгох чадвар дээр суурилсанд оршиж байна. Зөвхөн гунигласан, баярласан гэх мэт мэдрэмжийг таних биш, тухайн сэтгэл хөдлөлийн цаад шалтгааныг таамаглан, хүний хувьд утга учиртай, логиктой хариу үзүүлэхийг зорьдог.
Ань-ань нь ярианы бичлэг, нүүрний хувирал, дууны өнгө, хөдөлгөөн, зан үйлийн хэв маяг зэрэг асар их хэмжээний өгөгдөлд тулгуурласан мэдээллийн сантай. Тэрээр эдгээрийг нэгэн зэрэг боловсруулж, тухайн хүний сэтгэл санааны төлөвийг тодорхойлох оролдлого хийдэг. Дуу хоолой сулрах, нүүрний хувирал өөрчлөгдөх, биеийн хөдөлгөөн удаашрах зэрэг жижиг дохиог нэгтгэн, тухайн мөчид ямар дэмжлэг хэрэгтэй байгааг тооцоолдог бүтэцтэй.
Жишээлбэл, ганцаардмал байдалтай, дуугаа хураасан ахмад хүнд танил аялгуутай хөгжим тоглуулж, үл ялиг яриа өдөх байдлаар ханддаг. Харин тайван бус, анхаарал сарниж буй хүүхдэд урам өгсөн, тайвшруулах үг хэлж, хялбар харилцаагаар сэтгэл зүйг нь тогтворжуулахыг зорьдог.
Хүнийг орлох бус, асрагчийг дэмжих зориулалт
Роботын хөгжүүлэгчид Ань-ангийн үүргийг санаатайгаар хязгаарлажээ. Тэдний байр суурь бол энэ төхөөрөмж нь хүний харилцааг орлох бус, харин асран хамгаалагч, багш, сэтгэлзүйч зэрэг мэргэжлийн ажилтнуудын ажлыг хөнгөвчлөх, сэтгэлзүйн дэмжлэгийг байнга хүргэх туслах хэрэгсэл гэж тодорхойлогддог.
Ань-ань тогтмол харилцаа үүсгэж, өдөр тутмын сэтгэл санааны хэлбэлзлийг мэдрэх замаар тухайн хүний өөрчлөлтийг анзаарч, асрагчдад нэмэлт дохио өгөх боломжтой гэж үзэж байна. Ингэснээр ганцаардал, түгшүүр, анхаарал сулрал зэрэг асуудлыг эрт илрүүлэх, цаашдын мэргэжлийн туслалцааг үнэ цэнтэй болгох боломжтой гэж судлаачид тайлбарлажээ.
Олон улсын зах зээл рүү чиглэсэн дараагийн алхам
Одоогоор Ань-ань робот цуврал үйлдвэрлэлийн шатанд шилжиж, анхны гол зах зээлээр АНУ-ыг төлөвлөж байгаа бөгөөд дараагийн зорилтот бүсүүдэд Европын холбоо болон Австрали багтаж байна. Үүнтэй зэрэгцэн Австралийн хэд хэдэн эмнэлэгтэй хамтран зөнөх өвчтэй өндөр настнуудад зориулсан клиник туршилтыг эхлүүлэхээр бэлтгэж байгаа аж.
Ингэснээр Ань-ань зөвхөн технологийн инновац бус, сэтгэлзүйн эрүүл мэндийн тусламж үйлчилгээний шинэ хэлбэрийг төлөөлөх бүтээгдэхүүн болохоор зорьж байна. Хүний дотоод ертөнцийг ойлгохыг хичээдэг “хиймэл оюунт панда” нь ирээдүйд эмнэлэг, асрамжийн газар, сургуулийн орчинд сэтгэл зүйн тогтвортой байдлыг дэмжих нэгэн шинэ хэрэгсэл болж магадгүй байна.
