Хэрэг явдлын товчоон
2025 оны 7 дугаар сарын 19-ний шөнө Хүүхдийн 100 орчимд УИХ-ын гишүүн асан Ц.Цэрэнпунцагийн хүү Санжаачойпэл, “Эрэл”-ийн Эрдэнэбатын хүү Тэмүүлэн, Лувсандоржийн Алтан-Очир, “Говь” ХК-ийн гүйцэтгэх захирал Б.Амарсайхан нар иргэн Д.Саяннямбуугийн биед халдсан хэрэг гарсан. Үүний улмаас хохирогч эрүүл мэндийн хохирол амссан юм.
Санжаачойпэл 60 гаруй хоног цагдан хоригдсоны дараа өнгөрсөн долоо хоногийн Бямба гарагт суллагдсан билээ.
Ц.Цэрэнпунцагийн байр суурь
МАН-ын бага хурлын үеэр УИХ-ын гишүүн асан Ц.Цэрэнпунцаг сэтгүүлчдэд хандан хүүгийнхээ асуудал болон өөрийн байр сууриа илэрхийлэв.
Тэрбээр хэлэхдээ:
“Намайг хэвлэлээр хангалттай гүжирдлээ. Хар тамхи хэрэглэсэн гэдэг мэдээллийн талаар мэдэхгүй, шүүхээс нь асуу. Миний хүү 28 нас хүрчихсэн, гэхдээ эцэг хүний хувьд үр хүүхдэдээ санаа зовж байна. Хохирогчийн эцэг эхтэй уулзаад эрүүл мэндийн төлбөрийг нь төлсөн. Өнөөдөр тэр хүүхэд Солонгосын сайн эмнэлэгт хагалгаа хийлгээд хамар ам нь бүтэн ирчихсэн байгаа.”
Тэр мөн хэргийг өдөөсөн нөхцөл байдлын талаар тайлбар өгөхдөө найз охины асуудлаас үүдэн маргаан гарсан гэж ойлгосноо дурдсан. Гэсэн ч хүүгийнхээ үйлдлийг зөвтгөхгүй байгаагаа илэрхийлж, хохирогчийн эцэгтэй уулзан уучлалт гуйж, эрүүл мэндийн төлбөрийг нь төлсөн хэмээн онцоллоо.
Хууль эрх зүйн талаас
Ц.Цэрэнпунцагийн хэлснээр, хүү нь УИХ-ын гишүүн асаны хүүхэд гэдэг шалтгаанаар хатуу шийтгэл хүлээсэн байж болзошгүй гэж үзэж буйгаа илэрхийлсэн. Тэрбээр “Хууль хүн бүрт тэгш үйлчлэх ёстой. Улс төрчийн хүүхэд гээд илүү хатуу шийтгэж болохгүй” хэмээн мэдэгдэв.
Дүгнэлт
Хэргийг мөрдөн шалгах ажиллагаа үргэлжилж байгаа бөгөөд холбогдох байгууллагууд эцсийн шийдвэрийг гаргах юм. Харин Ц.Цэрэнпунцагийн хувьд эцэг хүний байр сууринаас уучлалт гуйж, хохирогчийн эмчилгээний зардлыг даасан нь өнөөдрийн байдлаар хийж чадсан алхам гэж тодотголоо.
