Бурхан багшийн эхийн ачийг хариулсан дүйчин өдөр жил бүрийн намрын адаг сарын 22-нд тохиодог бөгөөд энэ жил буюу 2025 оны 11-р сарын 11-нд, маргааш тохиох гэж байна.
Бурхан багшийн энэрэл нигүүлслийн үйл
Судрын сурвалжид өгүүлснээр, Бурхан багш төрөл таалсан эхийнхээ ачийг хариулахуйяа 33 тэнгэрийн оронд заларч, тэнд ээждээ болон бусад тэнгэрүүдэд гурван сарын турш ном айлдсан байна. Тэрбээр тэдэнд ханьцашгүй дээдийн номын рашааныг хүртээж, эхийгээ нирвааны хутагт хүргэсний дараа намрын адаг сарын 22-ны өдөр Замбуутив буюу “энэ дэлхийд эргэн заларсан” хэмээн түүхэн сурвалжид тэмдэглэгдэн үлджээ.
Энэхүү үйл явдал нь Бурхан багшийн 12 их зохионгуйн нэг бөгөөд жилд тохиодог дөрвөн дүйчин өдрийн нэг юм.
Өдрийн утга, уламжлал
Энэ өдөр бурхны шашинт орнууд өргөн дэлгэр тэмдэглэж, эцэг эхийн ачийг санаж, буян номд шамдах, ариун сэтгэлээр сайн үйл бүтээхийг чухалчилдаг. Ижий, аавыгаа баярлуулах, сайхан үг хэлэх, бусдад туслах, нүгэл хилэнцээс тэвчих зэрэг нь “Эхийн ачийг хариулсан” дүйчин өдрийн гол учир билээ.
Хэрвээ эцэг, эх тань бурхны оронд одсон бол тэднийхээ буян, ачлалыг дурсан хойдын буянд зориулан сайн үйл хийдэг уламжлалтай.
Гандантэгчэнлин хийдийн насны авшиг
Энэ дүйчин өдөр Монголын Бурханы Шашны Төв — Гандантэгчэнлин хийдийн тэргүүн их хамба, хамба номун хан, гэвш лхаарамба Д.Жавзандорж сүсэгтэн олонд “Насны авшиг” хайрлах ёслол үйлдэнэ.
Насны авшиг нь хүний нас, хийморь, заяа төөргийг тэтгэж, эрүүл энх, амгалан жаргалантай амьдрахын ерөөл хэмээгддэг билээ.
