Гэрэл зургийг MPA агентлагийн онцгой зөвшөөрлөөр ашиглав
Нийслэлийн ерөнхий боловсролын сургуулийн сурагчдад энэ хичээлийн жилд нийт 296 автобус үйлчлэхээр болжээ. Эдгээр хүүхдийн автобусыг тогтмол техникийн үзлэг, оношилгоонд хамруулж, хагас жил тутамд шалгалт хийдэг байна. Мөн боловсролын салбарын багш, ажилтнуудыг эрүүл мэндийн үзлэгт хамруулах бэлтгэл ажлыг зохион байгуулжээ.
Шинэ барилга, засварын ажлууд
2025-2026 оны хичээлийн жилийн бэлтгэлийн хүрээнд нийслэлд 139 сургууль, цэцэрлэгийн барилгын ажил эхэлснээс 58 нь нийслэл болон дүүргийн төсвийн хөрөнгөөр хэрэгжиж байна.
- Өнөөдрийн байдлаар 15 сургууль, цэцэрлэг ашиглалтад орсон.
- Энэ онд багтаан 20 сургууль, цэцэрлэгийг нэмж хүлээлгэн өгөхөөр ажиллаж байна.
- Нийт 177 сургууль, цэцэрлэг болон эмнэлэгт их засварын ажил хийгдэж байна.
Газрын асуудал ба дэд бүтэц
Сургууль, цэцэрлэг, зогсоол зэрэг нийгмийн дэд бүтцийн төслүүдийн хүрээнд нийт 51 ажилд 624 нэгж талбар нөлөөлсөнөөс 273 нэгж талбарыг чөлөөлж, барилгын ажил гүйцэтгэсэн байна.
Сүүлийн дөрвөн жилд Улаанбаатар хотод 114 цэцэрлэг, 45 сургууль шинээр ашиглалтад оржээ. Энэ онд хугацаандаа дуусгаагүй, удааширсан 30 барилга (11 цэцэрлэг, 16 сургууль, 3 бага сургууль-цэцэрлэгийн цогцолбор)-ын гүйцэтгэлийг түргэвчлэх тусгай арга хэмжээ авчээ.
Барилгын ажлын явцын ангилал
- Ашиглалтад орсон: 9 барилга
- Эрчимжүүлж буй: 4 барилга
- Нэмэлт санхүүжилт шаардлагатай: 6 барилга
- Газрын асуудалтай: 1 барилга
- Шүүхийн шатанд шийдвэрлэгдэх: 6 барилга
Эдгээр ажлын явцыг нийслэлийн захиргааны хэвлэлийн алба мэдээллээ.
