Дэлхийд анх удаа хөдөлгөөнт цэнэглэлтийн технологи хэрэгжив
Францын нийслэл Парисын ойролцоох хурдны замд цахилгаан тээврийн хэрэгслийг хөдөлгөөнд оролцож байх үед нь утасгүйгээр цэнэглэх боломжтой дэлхийд анхны зам ашиглалтад орлоо. Энэхүү дэвшилтэт систем нь Electreon, VINCI Construction, Hutchinson, VINCI Autoroutes компаниуд болон Гюстав Эйфелийн их сургууль хамтран хэрэгжүүлсэн төсөл юм.
Шинэ зам нь A10 хурдны замын 1.5 км урт хэсэгт байрладаг бөгөөд цахилгаан автомашин, фургон, автобус, дунд болон хүнд даацын ачааны машин зэргийг зогсолтгүйгээр, утас залгахгүйгээр цэнэглэх боломжийг олгож байна.
Туршилтын үр дүн ба технологийн онцлог
Мэргэжилтнүүдийн хийсэн туршилтын дүнгээр энэхүү замаар дамжуулж буй цахилгаан эрчим хүчний дундаж чадал 200 кВт-аас дээш, харин оргил чадал нь 300 кВт-аас их байгааг тогтоожээ. Энэ нь дунд оврын ачааны машиныг тухайн зайд хөдөлгөхөд шаардлагатай эрчим хүчнээс хоёр дахин илүү үзүүлэлт юм.
Системийн аюулгүй байдал, бат бөх чанар, найдвартай ажиллагаа лабораторийн болон бодит нөхцөлд шалгагдаж, урт хугацаанд ашиглахад тохиромжтой болох нь батлагдсан байна.
Технологийн зарчим
Замын асфальтан хучилтын доор суурилуулсан индукцийн ороомог нь цахилгаан автомашинд байрлах хүлээн авагч төхөөрөмжид эрчим хүч дамжуулж, тээврийн хэрэгсэл хөдөлж байх явцад тогтвортой, тасралтгүй цэнэглэлтийг хангадаг.
Энэхүү шийдэл нь цахилгаан автомашины хамгийн том асуудал болох зайны хязгаарлалтыг бууруулах, цэнэглэх дэд бүтцийг өргөтгөх шинэ үеийн шийдэл болж байна гэж шинжээчид үнэлж байна.
