Хөгжлийн бэрхшээлтэй иргэдийг шатахуун түгээх станцад удаан хугацаагаар дараалалд зогсохоос сэргийлж, тэдэнд дараалал харгалзахгүй үйлчлэх шийдвэрийг Шатахууны шуурхай штабаас гаргажээ.
Шийдвэрийг Хөгжлийн бэрхшээлтэй хүний эрхийн тухай хуулийн 41.1.3 дахь заалтад үндэслэн гаргасан байна. Үүний дагуу шатахуун импортлогч, борлуулагч компаниудын ШТС-ууд шаардлага хангасан хөгжлийн бэрхшээлтэй иргэдэд үйлчилгээг шуурхай, хүртээмжтэй хүргэх нөхцөлийг бүрдүүлэх юм.
Тусгай тэмдэг болон үнэмлэхээ үзүүлнэ
Дараалал харгалзахгүй шатахуун авахын тулд хөгжлийн бэрхшээлтэй иргэн тээврийн хэрэгслийн тусгай таних тэмдэг болон хөгжлийн бэрхшээлтэй хүний үнэмлэхээ хамтад нь үзүүлэх шаардлагатай.
Эдгээр шаардлагыг хангасан тохиолдолд тухайн иргэн бусад автомашины урт дараалалд хүлээлгүйгээр шатахуун авах боломжтой болж байна.
Шатахууны шуурхай штаб ШТС-уудад үүсэж буй ачаалал, дарааллыг зохицуулахын зэрэгцээ хөгжлийн бэрхшээлтэй иргэдийн эрхийг хамгаалах, үйлчилгээний хүртээмжийг нэмэгдүүлэхэд анхаарч буйгаа мэдэгджээ.
ШТС-ууд шийдвэрийг хэрэгжүүлэх үүрэгтэй
Шатахуун түгээх станцын эрхлэгч болон түгээгч ажилтнуудад дээрх зохицуулалтыг хэрэгжүүлж, хөгжлийн бэрхшээлтэй иргэдэд хүндрэл чирэгдэл учруулахгүйгээр шуурхай үйлчлэх чиглэл өгсөн байна.
Мөн шатахуун авахаар дараалалд зогсож буй бусад жолооч, иргэдийг хөгжлийн бэрхшээлтэй хүмүүсийн дараалалгүй үйлчлүүлэх эрхийг хүндэтгэж, харилцан ойлголцолтой хандахыг уриалжээ.
Ингэснээр шатахууны станцын дараалал ихэссэн үед хөгжлийн бэрхшээлтэй иргэд удаан хугацаагаар хүлээх шаардлагагүй болж, холбогдох бичиг баримтаа үзүүлэн шууд үйлчилгээ авах нөхцөл бүрдэж байна.
