Педро Санчесийн мэдэгдэл
Испанийн Ерөнхий сайд Педро Санчес Социалист Ажилчдын Намын (PSOE) хурлын үеэр илтгэл тавихдаа Газын зурваст Израилийн Засгийн газраас хэрэгжүүлж буй бодлогыг эсэргүүцэж байгаагаа илэрхийлсэн юм. Тэрбээр спортын холбоод Израилийн тамирчдыг олон улсын тэмцээнд оролцуулж буйгаа эргэн харах ёстой гэж онцолж, Украин руу халдсаны дараа Оросын тамирчдыг уралдаанаас хассан жишээтэй харьцуулан Израильд ч ижил арга хэмжээ авах хэрэгтэй хэмээн мэдэгджээ.
ОУОХ-ны байр суурь
Гэвч Олон Улсын Олимпын Хороо (ОУОХ) энэхүү уриалгыг дэмжихгүй гэдгээ албан ёсоор зарласан байна. Түүнчлэн Израиль болон Палестины Үндэсний Олимпын Хороодын үйл ажиллагааг цаашид ч дэмжиж ажиллахаа илэрхийлжээ. Өнгөрсөн жил болсон Парисын олимпын үеэр хоёр улсын тамирчдын олимпын хотхонд эерэг харилцаа тогтсоныг сайн жишээ болгон нэрлэсэн байна.
Испанид өрнөсөн эсэргүүцэл
Испанийн спортын сайд Пилар Алегрия Италийн Миланд болох ОУОХ-ны Гүйцэтгэх Зөвлөлийн хуралд Израилийн асуудал гол хэлэлцүүлгийн нэг болохыг онцлон ярьжээ. Үүнээс өмнө Билбао хотод болсон мэргэжлийн дугуйн “Vuelta” уралдааны 11 дэх гарааны үеэр Палестины хэт үзэлт иргэдийн эсэргүүцлийн хөдөлгөөн оргилдоо хүрсэн байна. Энэхүү уралдаан Испанийн нутагт эхэлснээс хойш Израилийг эсэргүүцсэн халдлага, саад тотгор бараг өдөр бүр гарч байсныг тэмдэглэжээ.
UCI-ийн хариу мэдэгдэл
Олон Улсын Дугуйн Холбоо (UCI) есдүгээр сарын 15-нд мэдэгдэл гаргаж, Испанийн Ерөнхий сайд болон Засгийн газрынхаа үйлдлээр тэмцээнийг аюулгүй зохион байгуулахад саад учруулж байгаад харамслаа илэрхийлэв. Мөн хууль сахиулах байгууллагууд болон бэрхшээлтэй нөхцөлд ажилласан зохион байгуулагчдад талархал илэрхийлсэн байна.
