Хүнд хөгжмийн ертөнцийн домог болсон “Kiss” хамтлагийн үүсгэн байгуулагчдын нэг, гитарчин Эйс Фрейли (жинхэнэ нэр нь Пол Дэниел Фрейли) 74 насандаа таалал төгсөв. Тэрбээр өнгөрсөн сард студидээ ажиллаж байхдаа ухаан алдан унаж, тархинд цус алдаж эмчилгээ хийлгэлгүй байсаар бурхны оронд оджээ.
“Spaceman”-ийн гаргасан шинэ өнгө
Эйс Фрейли 1951 оны дөрөвдүгээр сарын 27-нд Нью-Йоркт нидерланд-герман гаралтай гэр бүлд төрж өссөн. Тэрбээр 1973 онд Пол Стэнли, Жин Симмонс, Питер Крисс нартай хамт “Kiss” хамтлагийг үүсгэн байгуулсан бөгөөд хамтлаг хурц будаг, ганган хувцас, өвөрмөц дүр төрхөөрөө дэлхий дахинд алдаршсан юм.
Фрейли хамтлагийн гол өнгө болсон гитарыг хариуцаж, “Spaceman” нэрээр тоглодог байв. Түүний зохиосон “Cold Gin”, “Shock Me”, “Rocket Ride” зэрэг бүтээлүүд “Kiss”-ийн түүхэн дэх хамгийн алдартай дуунуудын тоонд багтдаг.
Гарсан, буцаж ирсэн, дахин ганцаарчилсан замнал
1980-аад оны эхээр дотоод зөрчил, архи, мансууруулах бодисын асуудлаас болж тэр хамтлагаа орхиж, “Frehley’s Comet” нэртэй шинэ хамтлаг байгуулсан. Энэхүү төсөл хэд хэдэн амжилттай цомог гаргасан ч Фрейлигийн нэр “Kiss”-ийн домгоос салсангүй.
1996 онд тэр хамтлагтаа эргэн нэгдэж, дэлхий даяар хийгдсэн аялан тоглолтоороо бүх тасалбарыг бүрэн борлуулж чадсан юм. Гэвч 2000 онд дахин хамтлагаасаа гарч, ганцаарчилсан уран бүтээлээ үргэлжлүүлжээ.
Хүнд хөгжмийн түүхэнд үлдэх нэр
Эйс Фрейли хард рок хөгжмийн 1980-аад оны гитарчдын үлгэр жишээ болсон хүн юм. Түүний өвөрмөц тоглолтын техник, хүнд рокийг тайзан дээр дүр төрхөөр нь хослуулсан уран бүтээл нь олон үеийн хөгжимчдөд урам зориг өгсөөр байна.
Домогт хөгжимчинд амгалан нойрсоорой гэж хэлье
Түүний бүтээлүүдийг бид үргэлж сонссоор байх болно