Иргэдийн үүрэн холбоо, цахилгаан, дулаан, ус болон бусад өдөр тутмын хэрэглээний төлбөрийн мэдээллийг зээлийн оноо тооцоход сөрөг үзүүлэлт болгохгүй байхаар Монголбанк шинэ зохицуулалт хийжээ.
Энэхүү өөрчлөлт нь УИХ-ын “УИХ таныг сонсож байна” цэсээр дамжуулан иргэдээс ирүүлсэн санал, хүсэлтийн хүрээнд хэрэгжсэн байна. Тодруулбал, Зээлийн мэдээллийн сантай холбоотой зохицуулалтыг шинэчлэх чиглэлийг Монголбанкинд өгсний дагуу өдөр тутмын хэрэглээний төлбөрүүд зээлийн оноонд хасах нөлөө үзүүлэхгүй байхаар шийдвэрлэсэн аж.
Шинэ зохицуулалтын үр дүнд 390 мянга гаруй өр төлбөрийн мэдээлэл, 300 мянга гаруй хүлээгдэж буй төлбөрийн мэдээлэл зээлийн оноонд сөргөөр тооцогдохгүй болжээ. Нийтдээ 690 мянга гаруй мэдээлэл иргэдийн зээлийн оноог бууруулах хүчин зүйлд тооцогдохгүй болсон байна.
Гэхдээ цахилгаан, дулаан, ус, үүрэн холбоо зэрэг үйлчилгээний төлбөрийн мэдээлэл Зээлийн мэдээллийн сан болон тухайн иргэний зээлийн түүхэнд хэвээр хадгалагдана. Харин эдгээр мэдээллийг зээлийн оноо бодохдоо оноо хасах үндэслэл болгохгүй юм.
Монголбанк цаашид Зээлийн мэдээллийн сангийн оноо тооцох аргачлалыг илүү уян хатан болгохоор ажиллаж байна. Мөн иргэдэд хүндрэл учруулдаг зарим журам, зохицуулалтыг шинэчлэх ажлыг үргэлжлүүлэхээр төлөвлөжээ.
Ийнхүү өдөр тутмын хэрэглээний төлбөрийн мэдээлэл зээлийн түүхэнд үлдэх ч иргэдийн зээлийн оноонд сөрөг нөлөө үзүүлэхгүй болсон нь олон хүнд санхүүгийн дарамт багасгах чухал өөрчлөлт болж байна.
