“Netflix” компани “Warner Bros”-ийн студи болон стриминг салбарыг 82.7 тэрбум ам.доллароор авах шийдвэр гаргасны дараа “Paramount Skydance” студи “Warner Bros”-д 108.7 тэрбум ам.долларын санал тавьсан тухай мэдээлэв. Ингэснээр энтертайнментийн салбарын хоёр том тоглогч “Warner Bros”-ийн каталогийг эзэмших эрхийн төлөө өрсөлдөөн ширүүссэн байна.
Warner Bros-ийн ТУЗ Paramount-ийн саналыг татгалзахыг уриалжээ
Өнгөрсөн долоо хоногт “Warner Bros”-ийн Төлөөлөн удирдах зөвлөл (ТУЗ) “Paramount”-ийн саналаас татгалзахыг хувьцаа эзэмшигчдэдээ уриалсан гэж мэдээлэв. Үүний дараа “Paramount” илүү өндөр мөнгөн дүн санал болгосон ч хэлцэл урагшлахгүй байгаа нөхцөл үүссэн байна.
Paramount шүүхэд хандаж, санхүүгийн дүн шинжилгээг шаардав
Энэ нөхцөл байдлын улмаас “Paramount” студи “Warner Bros”-ийг шүүхэд өгсөн гэж мэдээлэлд дурдлаа. “Paramount”-ийн маргаанаар тэдний санал болгож буй нэгжийн үнэ 30 ам.доллар байгаа нь “Netflix”-ийн санал болгосон 27.75 ам.доллароос өндөр тул илүү ашигтай гэж үзэж байна.
Ийм үндэслэлээр “Paramount” АНУ-ын Делавер мужийн шүүхэд нэхэмжлэл гаргаж, “Warner Bros”-ийн ТУЗ яагаад “Netflix”-ийн саналыг дэмжиж буй шалтгаанаа ил тод болгох, мөн шийдвэрийнхээ суурь болсон санхүүгийн дүн шинжилгээгээ нийтэд харуулахыг шаарджээ.
