Монголын киберспортын нүүр царай болсон The MongolZ баг CS2-ийн томоохон тэмцээн болох StarLadder Budapest Major 2025-ын шөвгийн наймд шалгарч, өнгөрсөн мэйжорын аварга Team Vitality-тай тулгарахаар боллоо. Энэ нь зөвхөн Монголын фэнүүдийн төдийгүй дэлхийн CS2 сонирхогчдын анхаарлын төвд буй тулаан болж байна.
Маргааш буюу 12 дугаар сарын 12-нд, Улаанбаатарын цагаар 03:00 (ULAT)-д The MongolZ болон Vitality багууд MVM Dome аренад нүүр тулна. Зургийн дагуух албан ёсны хуваарийн дагуу уг тоглолт Европын орон нутгийн цагаар Пүрэв гарагийн 22:00-д эхлэхээр товлогдсон бөгөөд шууд хасагдах шатны жинхэнэ “шалгуур” тулаануудын нэг болох юм.
Шөвгийн наймын тулааны үндсэн мэдээлэл
- Тэмцээн: StarLadder Budapest Major 2025
- Байршил: Будапешт, Унгар
- Үе шат: Шөвгийн найм (Quarter-finals)
- Хослол: The MongolZ vs Team Vitality
- Формат: Bo3 (3 газрын зураг, 2 хожил авсан баг ялалт байгуулна)
- Цаг: 12-р сарын 12, 03:00 (Улаанбаатарын цаг)
Vitality бол өмнөх мэйжорын аварга, Европын шилдэг багуудын нэг гэдгээрээ онцгойдог. Map pool, LAN туршлага, pressure-ийн дор тоглох чадвараараа олон жилийн турш дээд түвшний багийн жагсаалтад бичигдэж ирсэн. Ийм багийн эсрэг The MongolZ тактик, map veto, бэлтгэлийн чанараараа хэрхэн тоглох нь зөвхөн Монголын фэнүүд төдийгүй олон улсын шинжээчдийн сонирхлыг хөдөлгөж байна. Энэхүү шөвгийн наймын тулааны ялагч:
- Шөвгийн дөрөв (Semi-finals)-т шалгарна
- Тэндээ Spirit болон Falcons багуудын хожсон багийн эсрэг тоглох эрхтэй болно
Иймээс энэ тоглолт нь зөвхөн “шөвгийн наймд үлдлээ” гэдэг нэр хүндийн тухай бус, финал руу дөхөх хаалга нээгдэх эсэхийг шийдэх хариуцлагатай мөч юм.
