Монгол Улсын Ерөнхийлөгч Ухнаагийн Хүрэлсүх Бүгд Найрамдах Киргиз Улсын Бишкек хотод болох Шанхайн хамтын ажиллагааны байгууллагын гишүүн орнуудын Төрийн тэргүүн нарын өргөтгөсөн хуралдаанд оролцохын өмнө БНХАУ-ын дарга Ши Жиньпинтэй уулзжээ.
Төрийн тэргүүн нар өмнө нь 2025 онд БНХАУ-д болсон ШХАБ-ын дээд түвшний уулзалт, мөн Дэлхийн II дайн болон Хятадын ард түмний Японы эсрэг дайны ялалтын 80 жилийн ойг тохиолдуулсан арга хэмжээний үеэр уулзаж, хоёр орны харилцаа, хамтын ажиллагааны өргөн хүрээний асуудлаар санал солилцож байснаа дурдсан байна.
Иж бүрэн стратегийн түншлэлийг улам гүнзгийрүүлнэ
Уулзалтын үеэр талууд Монгол, Хятадын “Иж бүрэн стратегийн түншлэл”-ийн харилцаа олон салбарт тогтвортой өргөжин хөгжиж, улс төрийн харилцан ойлголцол болон итгэлцэл улам батжиж байгаад сэтгэл хангалуун байгаагаа илэрхийлжээ.
Мөн худалдаа, эдийн засаг, хил дамнасан төмөр замын бүтээн байгуулалт, сэргээгдэх эрчим хүч, байгаль орчин, хөдөө аж ахуй, хөнгөн үйлдвэр зэрэг салбарт өмнө нь дээд түвшинд тохиролцсон ажлууд бодит үр дүнд хүрч байгааг хоёр тал сайшаасан байна.
БНХАУ-ын дарга Ши Жиньпин Монгол Улс Цөлжилттэй тэмцэх НҮБ-ын конвенцын Талуудын 17 дугаар бага хурлыг амжилттай зохион байгуулсанд баяр хүргэжээ.
Худалдааны эргэлтийг 30 тэрбум ам.долларт хүргэхээр тохиролцов
Талууд хоёр орны харилцаа, хамтын ажиллагааг урт хугацааны тогтвортой эдийн засгийн хөгжил, бодлогын төлөвлөлттэй уялдуулах шаардлагатай гэдэгт санал нэгджээ.
Энэ хүрээнд аж үйлдвэр, дэд бүтэц, ногоон хөгжил, эрдэс баялаг болон сэргээгдэх эрчим хүчний чиглэл дэх хамтын ажиллагааг илүү гүнзгийрүүлэхээр ярилцсан байна.
Мөн Монгол, Хятадын худалдааны нийт эргэлтийг ирэх таван жилийн хугацаанд 30 тэрбум ам.долларт хүргэх зорилт тавихаар тохиролцжээ.
Хил дамнасан төмөр замын төслүүдийг түргэтгэнэ
Төрийн тэргүүн нар хил дамнасан төмөр замын боомтуудыг байгуулах нь хоёр орны худалдаа, эдийн засгийн хамтын ажиллагааг эрчимжүүлэхэд стратегийн ач холбогдолтойг онцолсон байна.
Үүний хүрээнд Гашуунсухайт–Ганцмод боомтын бүтээн байгуулалтыг 2027 онд бүрэн дуусгах асуудлыг хэлэлцжээ.
Мөн Шивээхүрэн–Сэхээ, Бичигт–Зүүнхатавч, Ханги–Мандалын хил дамнасан төмөр замын төслүүдийг шат дараатайгаар ашиглалтад оруулах талаар санал солилцсон байна.
Эдгээр төслүүд хэрэгжсэнээр Монгол Улсын экспортын хүчин чадал нэмэгдэхийн зэрэгцээ хоёр улсын хоорондын тээвэр, логистикийн урсгал илүү тогтвортой болох боломжтой юм.
Шатахууны нийлүүлэлтийн асуудлыг хэлэлцэв
Олон улсын зах зээлд түлш, шатахууны нийлүүлэлт тогтворгүй байгаа энэ үед Монгол Улсаас гаргасан газрын тосны бүтээгдэхүүн худалдан авах хүсэлтийг БНХАУ хүлээн авч, нийлүүлэлт хийж байгаад Ерөнхийлөгч У.Хүрэлсүх талархал илэрхийлжээ.
Харин БНХАУ-ын дарга Ши Жиньпин олон улсын геополитик болон геостратегийн нөхцөл байдлаас шалтгаалан дэлхийн түлш, шатахууны нийлүүлэлт савлагаатай байгаа хэдий ч Монгол Улсад нефтийн бүтээгдэхүүн нийлүүлэхэд цаашид ч дэмжлэг үзүүлэхээ илэрхийлсэн байна.
Монгол, Хятад, Оросын гурван талт төслүүдийг үргэлжлүүлнэ
Уулзалтын үеэр Монгол, Хятад, Оросын гурван талт хамтын ажиллагааны хүрээнд хэрэгжиж буй томоохон төслүүдийн талаар мөн ярилцжээ.
Тухайлбал, “Төмөр замын төв коридор”-ыг шинэчлэх, хүчин чадлыг нь нэмэгдүүлэх, Оросоос Хятад руу Монголын нутаг дэвсгэрээр дамжих хийн хоолойн төсөл болон Эрдэнэбүрэнгийн усан цахилгаан станцын бүтээн байгуулалтын явцын талаар санал солилцсон байна.
Ийнхүү хоёр улсын төрийн тэргүүн нар худалдаа, дэд бүтэц, эрчим хүч, хил дамнасан төмөр зам болон стратегийн томоохон төслүүдийг урагшлуулах асуудлаар байр сууриа нэгтгэж, Монгол, Хятадын иж бүрэн стратегийн түншлэлийг дараагийн шатанд хүргэхээр тохиролцжээ.
