Сөрөг хүчний улс төрчийг “худал мэдээлэл тараасан” гэж буруутгажээ
Оросын шүүх Украины дайныг эсэргүүцдэг сөрөг хүчний улс төрч Лев Шлосбергт 11 жил, нэг сарын хорих ял оноосон байна.
63 настай Шлосберг нь Яблоко намын дэд дарга бөгөөд 2016-2021 онд Псков мужийн хууль тогтоох байгууллагад сонгогдон ажиллаж байжээ.
Москвагаас баруун хойд зүгт 600 орчим километрийн зайд байрлах Псков хотын шүүх түүнийг Оросын зэвсэгт хүчний “нэр хүндийг гутаасан”, мөн “худал мэдээлэл тараасан” гэх үндэслэлээр буруутгасан байна.
Яблоко намыг сонгуулиас хассан шийдвэр хэвээр үлдэв
Даваа гарагт Оросын дээд шүүх мөн ирэх сард болох парламентын сонгуульд Яблоко намыг оролцуулахгүй байх өмнөх шийдвэрийг хэвээр үлдээжээ. Ингэснээр тус намын давж заалдах хүсэлтийг хэрэгсэхгүй болгосон байна.
Одоогийн байдлаар Яблоко нь Кремлийн Украинд явуулж буй дайныг эсэргүүцдэг, албан ёсны бүртгэлтэй Оросын цорын ганц улс төрийн хүчинд тооцогдож байна.
Дайныг зогсоохыг уриалсан хэлэлцүүлэг, зураг нийтэлсэн нь яллах үндэслэл болжээ
Шлосбергийг олон нийтийн дунд дайныг зогсоохыг уриалсан хэлэлцүүлэг зохион байгуулсан, мөн Британийн нэгэн сэтгүүлийн нүүрэнд гарсан Украины дайныг шүүмжилсэн утгатай зургийг өөрийн Telegram сувагт нийтэлсэн гэх үндэслэлээр ялласан байна.
Тэрээр өөрт нь тулгасан эдгээр буруутгалыг үндэслэлгүй гэж няцааж байжээ.
Шлосберг сүүлийн хоёр жилийн хугацаанд хоёр дахь удаагаа шүүхийн өмнө очиж байна. Өмнө нь тэр “гадаадын агентын тухай хууль” зөрчсөн гэх шалтгаанаар шийтгүүлж байсан юм.
“Орос улс эрх чөлөөний итгэл найдвараас эрх чөлөөг устгах хүртэл зам туулсан”
Баасан гарагт шүүхэд өгсөн сүүлчийн мэдүүлэгтээ Шлосберг Оросын сүүлийн 30 жилийн замналыг хурцаар шүүмжилжээ.
Тэрээр Орос улс “эрх чөлөөний итгэл найдвараас эхлээд хүний болон иргэний эрх, эрх чөлөөг бараг бүрэн устгах хүртэл замыг туулсан” гэж мэдэгдсэн байна.
Мөн Украины дайн “Оросын иргэн бүрийн амьдралыг өөрчилсөн” гэж хэлээд, “дайны хохирлын жинхэнэ тоог сонсвол улс орон бүхэлдээ чичрэх болно” хэмээн анхааруулжээ.
Яблоко нам шүүхийн шийдвэрийг давж заалдана
Яблоко нам Шлосбергт оноосон ялыг эрс буруушааж, түүнийг “Эх орноо хайрлаж, дайны галыг зогсоохыг уриалсныхаа төлөө харгис шийтгэл хүлээсэн” гэж мэдэгдсэн байна.
Тус нам шүүхийн шийдвэрийг давж заалдахаа мөн амлажээ.
Эмнести Интернэйшнл шийтгэлийг буруушаав
Хүний эрхийн Эмнести Интернэйшнл байгууллага Лев Шлосбергт оноосон ялыг буруушаасан мэдэгдэл гаргасан байна.
Тус байгууллагын Зүүн Европ, Төв Азийн бүсийн захирал Мари Струтерс “Түүнийг дур зоргоороо ялласан нь энх тайвныг уриалж, үг хэлэх эрх чөлөөгөө эдэлснийх нь төлөө илт өшөө авсан үйлдэл юм. Оросын эрх баригчид Лев Шлосбергийг нэн даруй, болзолгүйгээр суллаж, түүнд оноосон ялыг хүчингүй болгох ёстой” гэж мэдэгджээ.
Шлосбергийн хэрэг нь Орост Украины дайныг эсэргүүцсэн улс төрийн дуу хоолой хэр хатуу дарамтад орж байгааг дахин харуулсан үйл явдал болж байна.
