Улаанбаатар хотын дугуйн замын сүлжээг үе шаттайгаар нэмэгдүүлж, нийт уртыг 450 километрт хүргэхээр төлөвлөжээ. Ингэснээр нийслэлд дугуйгаар зорчих боломжийг илүү өргөжүүлж, Өнөр хорооллоос Амгалан хүртэл тасралтгүй явах нөхцөл бүрдүүлэхээр зорьж байна.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Монголын дугуйн холбооны төлөөллүүдтэй уулзах үеэрээ дугуйн спорт, дэд бүтэц болон иргэдийн идэвхтэй, эрүүл амьдралын хэв маягийг дэмжих чиглэлээр хэрэгжүүлэх ажлуудын талаар танилцуулжээ.
Энэ онд нийслэлд шинээр 76 км дугуйн зам барьсан бол ирэх жил дахин 115 км зам нэмэхээр төлөвлөсөн байна.
Б.Пүрэвдагва:
“Нийслэлийн дугуйн замыг нэмэгдүүлж, дугуй унаж буй хүмүүст ээлтэй хотыг бий болгох зорилгоор энэ жил 76 км дугуйн зам барьж байгууллаа. Ирэх жил 115 км дугуйн замыг нэмж, Улаанбаатар хотын нийт дугуйн замын сүлжээг 450 км хүргэнэ. Ингэснээр Өнөр хорооллоос Амгалан хүртэл дугуйгаар зорчих нөхцөлийг бүрдүүлэх юм. Олон улсын хотуудын жишгээр Туул голыг дагасан экосистем цэцэрлэгт хүрээлэн, дугуйн зам, явган хүний зам, гүйлтийн замтайгаар хийгдэнэ. Зайсангаас төв талбай хүрэх гүүрэн байгууламжтай дугуйн замыг 2027 онд барихаар М-Си-Эс групптэй зөвшилцсөн. Нийслэл дугуй унах, дугуйн спортыг дэмжинэ”
гэжээ.
Туул гол дагуу дугуй, явган болон гүйлтийн зам байгуулна
Шинэ төлөвлөгөөнд зөвхөн дугуйн зам нэмэхээс гадна Туул голын дагуу олон зориулалттай ногоон бүс байгуулах ажил багтаж байна. Тус бүсэд цэцэрлэгт хүрээлэн, дугуйн зам, явган хүний зам болон гүйлтийн замыг нэг дор шийдэхээр төлөвлөжээ.
Мөн Зайсангаас төв талбай хүртэл гүүрэн байгууламж бүхий дугуйн зам барих ажлыг 2027 онд эхлүүлэхээр М-Си-Эс групптэй зөвшилцсөн байна.
Монголын дугуйн холбооны ерөнхийлөгч Б.Гүрсоронзон нийслэл дугуйн замыг бодлогоор нэмэгдүүлж байгааг дэмжиж байгаагаа илэрхийлжээ.
Тэр:
“Нийслэл олон км дугуйн замыг бодлогоор барьж байгаад нийт дугуйчид болон дугуй сонирхогч залуусын өмнөөс талархал илэрхийлье. Монголын дугуйн холбоо нийтийн биеийн тамирыг хөгжүүлэх, замын хөдөлгөөний аюулгүй байдлыг сурталчлах чиглэлээр гол ажлуудаа хийж байна. Олон улсын жишгийг хангасан дугуйн спортын тэмцээн, уралдаан зохион байгуулна. Өнгөрсөн наймдугаар сард Цонжинболдогт “Gravel Gran Fondo Ulaanbaatar 2026 & Yam Trail Run” олон улсын дугуйн тэмцээнийг зохион байгуулсан. Энэ тэмцээнийг 2027 оны наймдугаар сард мөн хийнэ. Одоогийн байдлаар 20 орчим гадаадын тамирчин оролцох хүсэлтээ илэрхийлсэн”
гэж ярьсан байна.
Өнгөрсөн наймдугаар сард Цонжинболдогт болсон олон улсын дугуйн тэмцээнийг 2027 онд дахин зохион байгуулахаар төлөвлөж байгаа бөгөөд одоогоор 20 орчим гадаадын тамирчин оролцох сонирхлоо илэрхийлжээ.
Ийнхүү Улаанбаатар хот дугуйн замын сүлжээг 450 км хүргэх зорилт тавьж, нийслэлийн төв болон захын хорооллуудыг дугуйн замаар холбох, мөн амралт, спорт, явган хөдөлгөөний нэгдсэн орчныг нэмэгдүүлэх чиглэлд ажиллахаар болж байна.
