Улаангом, 2025 оны 7 сарын 29 – Увс аймгийн 100 жилийн ойн баяр наадмын нээлт үзэгчдийн сэтгэлийг хөдөлгөсөн гайхалтай уран бүтээл, соёлын үзүүлбэрүүдээр дүүрэн болж, өнөө орой 21:00 цагаас дахин тайзнаа тоглогдохоор боллоо.
Наадмын гол тайз дөрвөн өнцөгтэй байхаар бүтээгдсэн бөгөөд улаан, цагаан, хөх, шар өнгийн хувцастай бүжигчид талбайг дүүргэн гарч ирсэн нь тус аймагт оршин суудаг дөрвөн үндсэн угсаатны бүлэг болох дөрвөд, баяд, хотон, халх ястнуудыг бэлгэдсэн байна.
Нээлтийн хөтөлбөр нь монголчуудын, тэр дундаа дөрвөн ойрадын түүх, соёл, зан заншлыг гүнзгий таниулсан утга агуулгатай хөтлөгчийн үг, үзүүлбэрийн төгс уялдаатай байснаараа онцгой байв.
Наадмын тайзнаа дараах уран бүтээлчид төрлөө төлөөлөн дуугаа өргөн барьжээ:
- Ч.Чулуунбаатар – Хан Хэнтийн аймаг
- С.Баттулга – Цэцэрлэг уулын аймаг
- А.Долгор – Богд Хан уулын аймаг
- Х.Болормаа – Хан Тайшир уулын аймаг
- С.Жавхлан – “Цэнхэр тэнгэрийн орон” дуугаа дуулсан
Үүнээс гадна хиймэл оюун ухааны тусламжтайгаар Увс нутгийн алдарт удирдагч Ю.Цэдэнбал агснаар үг хэлүүлсэн нь наадамчин олны сэтгэлийг ихээхэн хөдөлгөсөн, онцгой мөч байлаа.
Түүнчлэн дараах үзүүлбэрүүд үзэгчдийн талархлыг хүлээв:
- Халимаг дуучны амьд тоглолт
- Дуучин Д.Мөнхбат, Д.Бурмаа, Л.Банзрагч нарын морьтой дуу
- Циркийн гайхалтай үзүүлбэрүүд
Энэхүү түүхэн ойн арга хэмжээнд Монгол Улсын Ерөнхийлөгч У.Хүрэлсүх биечлэн хүрэлцэн ирснээр баярын уур амьсгалыг улам чимж, өндөр ач холбогдол өгсөн юм.
