МАН-ын Ерөнхий нарийн бичгийн дарга Я.Содбаатар өнөөдөр VI Бага хурлын үр дүнгийн талаар мэдээлэл хийлээ. Тэрбээр Бага хурлаас гарсан шийдвэрийг хамтарсан Засгийн газрын үйл ажиллагаанд шууд нөлөөлөх улс төрийн томоохон алхам болохыг онцолсон байна.
Шийдвэрийн агуулга
МАН-ын Бага хурал Ерөнхий сайд, намын дарга Л.Оюун-Эрдэнийн улс төрийн илтгэлийг хэлэлцэж, 40 гаруй гишүүн санал асуулт тавьсны үндсэн дээр дараах дүгнэлтийг гаргажээ:
- Засгийн газарт хамтран ажиллаж буй улс төрийн намын УИХ дахь бүлгийн гишүүд гэрээг удаа дараа зөрчсөн
- МАН-ын анхан болон дунд шатны байгууллага, намын гишүүдээс улс төрийн шүүмжлэл, санал ирсэн
- Иймд хамтран ажиллах гэрээг зөрчсөн улс төрийн намыг шинэ бүрэлдэхүүнд оруулахгүйгээр Засгийн газрыг дахин бүрдүүлэх нь зүйтэй гэж үзсэн
Мөрийн хөтөлбөр үргэлжилнэ
Бага хурлын тогтоолд дурдсанаар, 2024 оны УИХ-ын сонгуулиар дэвшүүлсэн:
- “Шинэ сэргэлтийн бодлого”
- “Бүсчилсэн хөгжлийн реформ”
хөтөлбөрүүдийг хэрэгжүүлэх үйл ажиллагааг саадгүй үргэлжлүүлэхийг чухалчилсан байна.
Дараагийн алхам
Я.Содбаатар хэлэхдээ:
“Намын төлөөллийн төв байгууллага болох Бага хурал олонхын саналаар шийдвэр гаргасан учраас уг шийдвэрийг маргааш хамтарсан Засгийн газарт орж буй бусад намуудад танилцуулна. Мөн гэрээний дагуу Бодлогын зөвлөлд танилцуулж, цаашдын алхмуудыг хэрэгжүүлнэ” гэж мэдэгдэв.
Энэ нь АН-ыг Засгийн газраас гаргах улс төрийн процесс албан ёсоор эхлэх болсныг илтгэж байгаа юм.
