Олон нийтийг хамарсан марафон гүйлтийн үеэр замын хөдөлгөөн удаашрах, дуу чимээ болон хог хаягдал нэмэгдэх, оршин суугчдын тав тух алдагдах тухай гомдол олширсонтой холбоотойгоор Сөүл хотын захиргаа хотын төвд зохион байгуулах марафонуудын хяналтыг чангатгахаар болжээ.
Хотын захиргаа 2027 онд зохион байгуулагдах уралдаануудын хуваарь, маршрут, замын хөдөлгөөний зохицуулалт болон аюулгүй байдлын менежментийн төлөвлөгөөг Сөүл хотын цагдаагийн удирдлагатай хамтран хянахаа Лхагва гарагт мэдэгдсэн байна.
Шинэ зохицуулалтын дэлгэрэнгүйг арванхоёрдугаар сард танилцуулах бөгөөд тэр хүртэл ирэх жилийн марафонд оролцогчдын бүртгэлийг эхлүүлэхгүй байхыг зохион байгуулагчдаас хүсжээ.
Хотын төвийн марафонууд иргэдийн бухимдлыг нэмэгдүүлжээ
Сөүл хотын аялал жуулчлал, спортын товчооны захирал Чо Сон Хо:
“Бид олон оршин суугчдын эрүүл мэндэд оруулж буй марафоны хувь нэмрийг хүлээн зөвшөөрч байгаа ч хотын төвийн уралдааны улмаас үүссэн саад бэрхшээл сүүлийн үед бусдын санааг зовоосон асуудал болсон. Бид арга хэмжээг зохион байгуулагчдад санаачилга гаргаж, асуудлыг шийдвэрлэхийн тулд бидэнтэй хамтран ажиллахыг уриалж байна”
гэж хэлжээ.
Хамгийн сүүлд өнгөрсөн Ням гарагт болсон марафоны үеэр Гванхвамунаас Олимпын цэцэрлэгт хүрээлэн, Сангамаас Ёуидо хүртэлх чиглэлүүдийн хөдөлгөөнд ихээхэн саатал үүссэн байна.
Үүний улмаас нийт 190 автобусны чиглэлийг өөрчилж, бусад замын хөдөлгөөн ч удааширчээ.
Сөүл хотын дарга О Се Хун Даваа гарагт:
“Амралтын өдөр оршин суугчдын тав тухыг алдагдуулсан асуудал бүрийг би нухацтай авч үздэг. Зам бол бид бүгдийнх. Би оршин суугчдадаа тулгарсан саад бэрхшээлийг багасгахын төлөө тууштай ажиллах болно”
хэмээн сошиал хуудсаараа мэдэгдсэн байна.
Марафоны тоог бууруулсан ч асуудал бүрэн шийдэгдээгүй
Сөүл хотын захиргаа энэ оны эхээр марафон зохион байгуулах шинэ удирдамж танилцуулж, гарааны цагийг өглөөний 07:30-аас өмнө байхаар тогтоосон бөгөөд оролцогчдын тоонд дээд хязгаар тавьжээ.
Мөн өнгөрсөн онд хотод 15 марафон зохион байгуулагдаж байсан бол энэ жил долоо болгон бууруулсан байна.
Гэсэн хэдий ч одоогийн хууль тогтоомжийн дагуу марафон зохион байгуулахад орон нутгийн засаг захиргаанаас заавал зөвшөөрөл авах шаардлагагүй аж.
Ихэнх томоохон уралдаан төв засгийн газрын яамдын ивээл дор зохион байгуулагддаг тул Сөүл хотын захиргааны шууд хяналт хязгаарлагдмал хэвээр байгаа юм.
Хотын даргын мэдээлснээр төв засгийн газрын ивээн тэтгэсэн марафоны тоо өнгөрсөн онд нэг байсан бол энэ жил 23 болж өсжээ.
1,000-аас дээш оролцогчтой арга хэмжээнд шинэ шаардлага тавина
Саяхан батлагдсан үндэсний спортыг дэмжих тухай хуульд оруулсан нэмэлт өөрчлөлтөөр орон нутгийн захиргаанд томоохон спортын арга хэмжээг хянах илүү өргөн эрх олгохоор болсон байна.
Уг зохицуулалт 2027 оны дөрөвдүгээр сарын 21-нээс хэрэгжиж эхэлнэ.
Шинэ журмын дагуу 1,000 болон түүнээс дээш оролцогчтой спортын арга хэмжээ зохион байгуулагчид аюулгүй байдлын менежментийн төлөвлөгөөгөө орон нутгийн захиргаанд урьдчилан танилцуулах шаардлагатай болно.
Мөн орон нутгийн удирдлагууд тухайн төлөвлөгөөнд өөрчлөлт оруулах санал гаргах эрхтэй болох юм.
Ингэснээр Сөүл хот иргэдийн амгалан тайван байдал, замын хөдөлгөөн болон спортын арга хэмжээний хэрэгцээг зэрэг харгалзан үзсэн илүү хатуу зохицуулалт нэвтрүүлэхээр бэлтгэж байна.
