Ромын пап XIV Лео лхагва гарагт Ватиканы төлөөлөгчийн ордонд Нобелийн шагналт дуучин, ая зохиогч Боб Диланыг хүлээн авч уулзжээ.
Өдгөө 85 настай Боб Дилан Италид хийж буй “Rough and Rowdy Ways” аялан тоглолтынхоо хүрээнд Ром хотод саатах үеэр энэхүү уулзалт болсон байна. АНУ-ын Баруун болон Дундад нутгаас гаралтай хоёр эрхмийн уулзалт харьцангуй богино үргэлжилжээ.
Пап лам эрхи, Боб Дилан номоо бэлэглэв
Уулзалтад Боб Дилан хар өнгийн хувцас, юүдэнтэй цамц, бээлий өмсөн, шүхэр барьж ирсэн нь пап XIV Леогийн уламжлалт цагаан ёслолын хувцастай эрс ялгарч байжээ.
Уулзалтын үеэр пап лам дуучинд эрхи бэлэглэсэн бол Боб Дилан өөрийн намтарчилсан “Chronicles: Volume One” номоо гардуулсан байна.
Дилан Ромд саатсаныхаа дараа “Palazzo dello Sport” ордонд тоглолтоо хийхээр товложээ. Энэ нь түүний Италийн хэд хэдэн хотыг хамарсан “Rough and Rowdy Ways” аялан тоглолтын нэг зогсоол юм.
XIV Лео өмнө нь Диланы дууны үгийг эш татаж байжээ
Пап XIV Лео өмнө нь өөрийн бичсэн номын өмнөтгөлд Боб Диланы 1963 онд зохиосон цөмийн зэвсгийн эсрэг “Go Away You Bomb” дууны үгийг эш татаж байжээ.
Уг дуу тухайн үед албан ёсны бичлэг болон гараагүй бөгөөд Хүйтэн дайны үед бичигдсэн гар бичмэл нь 2013 онд ил болж, дуудлага худалдаанд тавигдсан түүхтэй.
Боб Диланы уран бүтээл болон Католик сүмийн тэргүүнүүдийн зам өмнө нь ч огтлолцож байсан юм.
1997 онд Италийн Болонья хотод болсон Католик залуучуудын үндэсний их чуулганы үеэр Дилан 300 мянга орчим хүний өмнө тоглолт хийж, “Knockin’ on Heaven’s Door” зэрэг дөрвөн дуу дуулж байжээ.
Тухайн үед Ромын пап II Иоанн Павел Боб Диланы хамгийн алдартай бүтээлүүдийн нэг болох “Blowin’ in the Wind” дууны үгийг номлолдоо эш татаж байсан байна.
Ийнхүү Боб Дилан энэ удаа Ватиканд пап XIV Леотой уулзаж, номоо бэлэглэсэн нь түүний уран бүтээл Католик сүмийн удирдагчдын анхаарлыг дахин татсан үйл явдал болов.
