Парис хотын De Beers үнэт эдлэлийн дэлгүүрт пүрэв гарагт зэвсэглэсэн этгээдүүд халдаж, нэг сая гаруй еврогийн үнэтэй эд зүйлс авч зугтсан талаар Францын албаныхан мэдээлжээ.
Урт голтой галт зэвсэг барьсан сэжигтнүүд орон нутгийн цагаар өглөөний 11:00 цагийн орчимд хотын хоёрдугаар тойрогт байрлах дэлгүүрт орсон байна. Тэд дээрмийн дараа мотоциклоор зугтжээ.
Зэвсгээр сүрдүүлсэн ч гал нээгээгүй байна
Парисын цагдаагийн газрын мэдээлснээр, халдагчид хүмүүсийг зэвсгээр айлган сүрдүүлсэн боловч буудаагүй, бэртэж гэмтсэн хүн гараагүй аж.
Цагдаагийн эх сурвалжийн урьдчилсан тооцоогоор, авч явсан үнэт эдлэлүүдийн нийт үнэ нэг сая еврогоос давах төлөвтэй байна.
Нэрээ нууцалсан гэрч нүүрээ балаклава малгайгаар халхалсан дөрвөн хүн дээрмийн дараа мотоциклоор хурдны замын зүг явсан гэж ярьжээ. Түүний хэлснээр, сэжигтнүүдийн нэг автомат буутай байсан байна.
Эрэн сурвалжлах ажиллагаанд нэмэлт хүч дайчилжээ
Цагдаагийн байгууллага сэжигтнүүдийг олохоор ихээхэн хүч, хэрэгсэл ашиглан ажиллаж байгаагаа мэдэгдсэн байна.
Прокурорын газрын мэдээллээр, хэргийг зохион байгуулалттай бүлгийн үйлдсэн зэвсэгт дээрэм гэж үзэж, Зохион байгуулалттай гэмт хэрэгтэй тэмцэх хэлтэс мөрдөн шалгаж эхэлжээ.
Парисын Alliance цагдаагийн үйлдвэрчний эвлэлийн төлөөлөгч Fabien Bogais хэргийн газарт сэтгүүлчидтэй уулзахдаа автомат буугаар зэвсэглэсэн дөрвөн сэжигтэн хэдхэн минутын дотор хэдэн зуун мянган еврогийн эд зүйл авч явсан гэж мэдээлсэн байна.
Дэлгүүрийг түр хааж, ажилтнуудад дэмжлэг үзүүлж байна
De Beers Group-ийн төлөөлөгч Rue de la Paix гудамж дахь салбарт нь дээрэм гарсныг баталжээ. Уг дэлгүүр нь тансаг үнэт эдлэлийн худалдаагаараа алдартай Place Vendôme талбайн ойролцоо байрладаг юм.
Төлөөлөгчийн хэлснээр, «ноцтой бэртэл гэмтэл» гараагүй бөгөөд компани ажилтнууддаа сэтгэл зүйн болон бусад шаардлагатай дэмжлэг үзүүлж байгаа аж. Мөрдөн шалгах ажиллагаанд зориулан дэлгүүрийн үйл ажиллагааг түр зогсоожээ.
Өмнөд Африкаас гаралтай De Beers нь алмазын худалдааны салбарт олон жилийн турш тэргүүлэх байр суурь эзэлж ирсэн компани юм.
Луврийн хулгайн дараах томоохон хэрэг
Энэ дээрэм нь Парист өдрийн цагаар үйлдэгдсэн үнэт эдлэлийн бас нэг томоохон хэрэг болж байна.
Өмнө нь 2025 оны аравдугаар сард Луврийн музейд халдсан этгээдүүд 88 сая еврогоор үнэлэгдсэн хаадын үнэт эдлэлүүдийг хулгайлсан юм.
Эх сурвалж: Associated Press
