АНУ-д зохион байгуулагдаж буй FIFA Club World Cup 2025 тэмцээн шинэ форматаар амжилттай үргэлжилж байна. Хэсэг тус бүрийн эхний тоглолтууд өндөр эрчтэй болж өнгөрсөн бөгөөд Өмнөд Америкийн төлөөлөл багууд хүчтэй тоглолтоороо онцгойрч байгаа нь анхаарал татаж байна.
С хэсэгт Португалын Benfica болон Аргентины Boca Juniors багууд тун өрсөлдөөнтэй тоглолт үзүүлэв. Boca-ийн довтлогч Miguel Merentiel 21 дэх минутад гоол оруулж, араас нь Rodrigo Battaglia 27 дахь минутад дахиад нэг гоол нэмсэн бол Benfica клуб Ángel Di María-ийн 11 метрийн торгуулийн цохилтоор хариу барьж, дараа нь Nicolás Otamendi 84 дэх минутад тоог тэнцүүлсэн. Тоглолт гурван улаан хуудастай ширүүн болсон ба хоёр клуб тус бүр тоглогчоо хасуулсан.
D хэсэгт Английн Chelsea клуб Лос Анжелесийн багийг 2:0 харьцаатай хожсон бол Бразилын Flamengo клуб Тунисын ES Tunis багийг мөн 2:0-оор хожин хэсгийн тэргүүнд бичигдэж байна. Pedro Neto, Enzo Fernández, Giorgian de Arrascaeta, Luiz Araújo нар гол үүрэг гүйцэтгэсэн бол Jorginho шинэ багтаа үнэтэй дамжуулалт өгсөн нь онцлох мөч байлаа.
Е хэсэгт Аргентины River Plate клуб Японы Urawa Red Diamonds багийг 3:1-ээр хожсон. Facundo Colidio, Sebastián Driussi, Maximiliano Meza нар гоол оруулсан бол Япон талаас Yūsuke Matsuo торгуулийн цохилтоор ганц гоол буцааж чадсан. Мөн энэ хэсэгт Мексикийн Monterrey клуб болон Италийн Inter Milan клубууд 1:1-ээр тэнцэж, оноо хуваалцсан. Sergio Ramos болон Lautaro Martínez нар тус тус гоол хийсэн.
F хэсэгт Бразилын Fluminense болон Германы Borussia Dortmund багуудын тоглолт гоолгүй тэнцээгээр өндөрлөсөн. Харин Африкийн төлөөлөл Mamelodi Sundowns клуб Солонгосын Ulsan Hyundai багийг 1:0-ээр буулган авч, хэсгийн тэргүүнд гарсан. Ялагчийн гоолыг Iqraam Rayners оруулжээ.
FIFA Club World Cup 2025 тэмцээний эхний тоглолтуудын дүнгээр Өмнөд Америк тивийн багууд илүү хүчтэй тоглолт үзүүлж, хэсгүүдээ тэргүүлж эхэлж байгаа нь тив хоорондын өрсөлдөөнд шинэ өнгө нэмж байна. Ялангуяа Бразилын Flamengo, Fluminense, Аргентины River Plate болон Boca Juniors клубууд тоглолтын арга барил, гоолын ур чадвараараа бусдаас ялгарч байна.
