ВАШИНГТОН — 2025 оны долдугаар сарын 7-ны өдөр АНУ-ын Техас мужийн Хьюстон хотод болсон КОНКАКАФ-ын Алтан цомын шувтаргын тоглолтод Мексикийн хөлбөмбөгийн шигшээ баг АНУ-ын багийг 2:1 харьцаагаар буулган авч, аваргын цомыг дахин хүртлээ.
Тоглолт эхлээд удаагүй байхад буюу 4 дэх минутанд АНУ-ын хамгаалагч Крис Ричардс гоолдож, тоглолтын тоог нээжээ. Гэсэн ч Мексикийн довтлогч Рауль Хименес 27 дахь минутад тооны харьцааг тэнцүүлж, дараа нь хагас хамгаалагч Эдсон Альварес 77 дахь минутад хожлын гоолыг оруулснаар багтаа ялалт авчирсан байна.
Тэмцээний турш бүх зургаан тоглолтод сэлгээгүй оролцсон Мексикийн шигшээ багийн ахлагч, ялагчийн гоолын эзэн Эдсон Альварес энэ удаагийн КОНКАКАФ-ын Алтан цомын “Шилдэг тоглогч”-оор нэрлэгдсэн байна.
Түүнчлэн Крис Ричардсын оруулсан гоол нь тус тэмцээний шувтаргын түүхэнд хамгийн эрт оруулсан гоол болж түүхэнд бичигдлээ. Өмнөх амжилтыг АНУ-ын хөлбөмбөгчин Майкл Брэдли 2011 оны финалын тоглолтод 8 дахь минутад гоолдсон байдаг.
Мексикийн шигшээ баг ийнхүү КОНКАКАФ-ын Алтан цомыг хоёр дахь удаагаа дараалан, нийт арав дахь удаагаа хүртсэнээр тус тэмцээний түүхэнд хамгийн олон удаа түрүүлсэн баг болоод байна. Харин АНУ-ын шигшээ баг өмнө нь долоон удаа энэ цомыг хүртэж байжээ.
