Нийслэл Улаанбаатар хот болон орон нутгийн хэмжээнд сүүлийн 72 цагийн хугацаанд шар өвсний түймрийн 25 тохиолдол бүртгэгдсэн тухай Онцгой байдлын ерөнхий газар (НОБГ) мэдээллээ. Хуурайшилтын түвшин нэмэгдэж, ой хээрийн түймрийн эрсдэл эрс өссөнтэй холбоотойгоор нөхцөл байдалд онцгой анхаарал хандуулж, шаардлагатай арга хэмжээг авч эхэлсэн байна.
Гал түймрийн нөхцөл байдал:
НОБГ-ын гамшгаас урьдчилан сэргийлэх хэлтсийн дарга, дэд хурандаа Д.Хадбаатар мэдээлэхдээ:
“Улаанбаатар хотод объектын гал түймэр нэмэгдэх хандлагатай байна. Он гарснаас хойш энэ төрлийн 767 удаагийн дуудлага мэдээлэл бүртгэгдсэн. Үүний үр дүнд иргэд, аж ахуйн нэгжийн 88.8 тэрбум төгрөгийн өмч хөрөнгийг хамгаалсан. Гэвч харамсалтай нь, гал түймрийн улмаас долоон хүн амь насаа алдсан, үүнд дөрвөн насанд хүрсэн хүн, гурван хүүхэд багтаж байна.”
Гал түймрийн гол шалтгаанууд:
- Ил гал буруу ашигласнаас – 45%
- Цахилгааны ашиглалт, угсралтын зөрчлөөс – 29%
- Яндангийн цоонолт, галын аюулгүй байдал алдагдсанаас – 17.6%
Иргэдэд хандан:
Онцгой байдлын байгууллагаас ил гал хэрэглэхгүй байх, цахилгаан шугамын аюулгүй байдлыг шалгах, яндан зуухаа цэвэрлэх, хуурайшилттай үед ил задгай хог шатаахгүй байхыг онцгойлон анхааруулж байна.
