Монгол Улсын Гавьяат тамирчин Э.Цэндбаатар мэргэжлийн боксын ээлжит ялалтаа байгуулж, BoxRec-ийн дэлхийн чансаанд жингийнхээ тавдугаар байрт дэвшжээ. Тэрээр өнгөрсөн амралтын өдрөөр Тажикистаны боксчин Мухаммад Якубовыг ялж, WBC холбооны АНУ-ын аваргын бүсийг хүртсэн байна.
Арван үеийн тулаанд шүүгчдийн нэгдсэн саналаар ялав
АНУ-ын Техас мужийн Эль Пасо хотод болсон тулаан бүтэн 10 үе үргэлжилжээ. Эхний үедээ өрсөлдөгчдөө хүнд цохилт өгсөн Э.Цэндбаатар цаашид ч санаачилгыг хадгалж, шүүгчдийн нэгдсэн шийдвэрээр ялалт байгуулсан байна.
Ингэснээр тэрээр мэргэжлийн рингэнд 16 дахь удаагаа ялж, нэг ч ялагдалгүй цувралаа үргэлжлүүллээ.
Харин Мухаммад Якубовын үзүүлэлт 26 тулаанаас 23 ялалт, хоёр ялагдал, нэг тэнцээ болов. Тэрээр 2025 оны наймдугаар сард Уильям Фостерыг ялж, WBC-ийн АНУ-ын аваргын бүсийг эзэмшсэн юм. Мөн оны арваннэгдүгээр сард Кристиан Чаконтой тулалдахдаа шүүгчдийн шийдвэрээр тэнцэж, бүсээ хамгаалж байжээ.
Жиндээ тавдугаарт, нийт боксчдоос 61-д бичигдэв
Якубовыг буулган авсан ялалт Э.Цэндбаатарыг BoxRec-ийн жингийн чансааны эхний тавд хүргэлээ. Түүний өмнө дараах дөрвөн боксчин жагсаж байна.
- АНУ-ын О’Шакүи Фостер
- Ирландын дэлхийн аварга асан Антони Какаче
- Мексикийн Эмануэль Наваррете
- Марокко гаралтай Испанийн тулаанч Моусса Голам
Харин BoxRec-ийн жин харгалзахгүйгээр гаргадаг нийт боксчдын чансаанд Монголын тамирчин 61 дүгээр байрт бичигджээ.