Apple есдүгээр сарын 9-нд болсон танилцуулга дээр iPhone 17, iPhone 17 Pro, Pro Max, iPhone Air, Apple Watch болон AirPods Pro 3-ыг танилцуулснаас гадна хэрэглэгчдийн хамгийн их хүлээж байсан iOS 26-ийн нээлтийн огноог зарласан. Шинэчлэлт есдүгээр сарын 15-наас эхлэн iPhone, iPad, Apple Watch-д түгэх бөгөөд олон сонирхолтой боломжуудыг агуулж байна.
Шинэ интерфейс: Liquid Glass
iOS 26-ийн хамгийн том өөрчлөлт бол Liquid Glass дизайн.
- Дэлгэцийн элементүүд илүү тунгалаг, динамик болж, дүрсүүд арын зургийг харуулах боломжтой.
- Apple Music болон бусад апп дээр дэлгэцийг зөвхөн товших бус, шударснаар удирдах шинэ хяналт нэмэгдсэн.
Apple Intelligence дээр суурилсан ухаалаг функцууд
- Шууд орчуулга – Messages, дуудлага, FaceTime дээр бодит цагт ажиллаж, англи, франц, герман, испани, португал зэрэг олон хэлийг дэмжинэ. AirPods Pro 3 хэрэглэгчийн эргэн тойрон дахь яриаг сонсож, шууд орчуулж чадна.
- Дуудлага шалгах – үл таних дуудлагад автоматаар хариулж, залгагчийн нэр, зорилгыг тодруулж харуулдаг.
- Hold Assist – оператор холбогдох хүртэл iPhone өөрөө шугамыг “барьж” байгаад, бэлэн болмогц хэрэглэгчид мэдэгдэнэ.
- Messages шинэчлэлт – үл таних дугаарын мессежийн шүүлтүүр, шинэ интерфейс, чатын дэвсгэр зураг өөрчлөх боломж нэмэгдсэн.
Бусад сайжруулалт
- Apple Maps – танил маршрутуудыг санаж, түгжрэлээс сэрэмжлүүлнэ. Мөн шинэ “Очсон газар” таб нэмэгдэж, өмнө зочилсон ресторан, дэлгүүр зэргийг харуулдаг.
- iPadOS – олон цонхтой ажиллахад зориулсан шинэ дэмжлэг орж, төхөөрөмжийг бараг компьютерийн түвшинд ашиглах боломжтой болсон.
iOS 26 нь есдүгээр сарын 15-наас хэрэглэгчдэд түгээгдэж, шинэ боломжуудыг тэр даруй ашиглах боломжтой болох юм.
