Индонезийн нийслэл Жакарта хотын ойролцоо гарсан төмөр замын ноцтой ослын улмаас амиа алдсан хүний тоо 14-д хүрч, 80 гаруй хүн гэмтсэн талаар албаныхан мэдээллээ.
Осол даваа гарагийн шөнө Бекаси хотын галт тэрэгний буудал дээр болсон байна. Урьдчилсан мэдээллээр, хот дотор зорчигч тээвэрлэдэг галт тэрэг холын чиглэлийн галт тэрэгтэй мөргөлджээ.
Төрийн өмчит төмөр замын KAI компанийн мэдээлснээр, мягмар гарагийн өглөөний байдлаар ослын улмаас 14 хүн нас барж, 84 хүн эмнэлэгт хүргэгдсэн байна.
Ослын газарт аврах ажиллагааг Индонезийн Үндэсний эрэн хайх, аврах агентлаг BASARNAS-ын дарга Мохаммад Сяафий удирдаж байгаа бөгөөд вагон дотор гацсан хүмүүсийг гаргах ажил үргэлжилж байгаа ажээ.
Түүний мэдээлснээр, галт тэрэгний вагонууд хүчтэй эвдэрсэн, доторх орон зай хязгаарлагдмал байгаа нь аврагчдын ажиллагаанд хүндрэл учруулж байна. Аврах багийнхан төмөр хэсгүүдийг зүсэгч төхөөрөмж ашиглан огтолж, гацсан зорчигчдыг гаргаж байгаа юм.
Анхны мэдээллээр ослын улмаас таван хүн нас барсан гэж байсан ч хожим хохирогчдын тоо нэмэгдсэн байна.
Төмөр замын компанийн хэвлэлийн төлөөлөгч Анне Пурбагийн мэдээлснээр, эхэндээ 79 хүн гэмтсэн гэж бүртгэгдсэн ч дараа нь уг тоо шинэчлэгдэж, 84 болжээ.
Мөргөлдөөнд оролцсон галт тэрэгнүүд нь Jakarta–Cikarang commuter line болон Argo Bromo Anggrek чиглэлийн галт тэрэг байсан гэж мэдээлсэн байна.
Зарим эх сурвалжийн мэдээлснээр, такси нэг галт тэргийг төмөр зам дээр мөргөж зогсоосны улмаас араас нь өөр галт тэрэг мөргөсөн байж болзошгүй нөхцөл байдлыг шалгаж байгаа ажээ.
Индонезийн төмөр замын сүлжээнд осол гарах тохиолдол өмнө нь ч бүртгэгдэж байсан. Тухайлбал, 2010 онд Жава аралд болсон төмөр замын ослоор 36 хүн амиа алдсан бол 2015 онд хяналтгүй гармаар гарч явсан микро автобус галт тэргэнд мөргүүлж, 18 хүн нас барж байжээ.
