Төсвийн хэлэлцүүлгийн үеэр хэлсэн шүүмжлэл
УИХ-ын чуулганы нэгдсэн хуралдаанаар 2026 оны улсын төсвийг хэлэлцэж буй үеэр гишүүн Г.Очирбат төсөвтэй холбоотойгоор хурц шүүмжлэл дэвшүүллээ. Тэрбээр төсвийн хүрээ, дунд хугацааны төлөвлөгөөтэй уялдахгүй, жилийн бодлогоо үгүйсгэсэн төсөв боловсруулсан хэмээн дүгнэсэн юм.
Төсвийн тоон жишээ ба зардлын өсөлт
Г.Очирбат гишүүний хэлснээр Ерөнхий сайдын төсөв 1.5 тэрбумаар нэмэгдсэн бол УИХ-ын дарга, Тамгын газрынх 3.1 тэрбумаар буурсан ч 2019 онтой харьцуулахад 5–6 дахин өссөн байна. Тухайлбал, Монгол Улсын Ерөнхийлөгчийн Тамгын газрын төсөв 2019 онд 4.6 тэрбум, 2020 онд 6.6 тэрбум төгрөг байсан бол 2026 онд 33.6 тэрбумд хүрчээ.
Мөн ЗГХЭГ 14.4 тэрбум төгрөгөөр зардлаа нэмүүлсэн бол Эдийн засгийн хөгжлийн төвийн төсөв 2025 онд 3 тэрбум байсан байхад ирэх жил 7.8 тэрбум болж өссөн байна. Хархорин хотын захиргаанд өмнө нь 4 тэрбум төгрөг төсөвлөж байсан бол энэ удаад 7 тэрбум болж нэмэгдсэн. Эрчим хүчний реформын зардал 2.7 тэрбумаас бараг өөрчлөгдөөгүй, 2.6 тэрбумаар дахин батлагдсан бол “Шинэ хоршоо хөгжлийн нэгж”-ид шинээр 4.4 тэрбумыг төсөвлөжээ.
Алдагдалтай төсөв ба шударга ёсны тухай
Тэрбээр ирэх оны төсөв алдагдалгүй гэх амлалтаас эсрэгээрээ 1.3 их наяд төгрөгийн алдагдалтай байгааг онцолж, татвар төлөгчдийн мөнгийг зөв зохистой зарцуулахгүй байгааг хурцаар шүүмжилсэн. Мөн “баахан нэгж, хороо шинээр байгуулж, шударга ёс ярьдаг ч бодит байдал дээр эсрэгээрээ байна” хэмээн мэдэгдэв.
Хувийн өнгө аяс бүхий мэдэгдэл
Тэрбээр илтгэлийнхээ төгсгөлд улс төрийн өнгө аястай байр суурь илэрхийлэн:
“Ардчилсан Намын хэдэн сайд руу арай дэндүү дайрч байна шүү. Өмнө нь Ерөнхийлөгч байсан хүн хүртэл гарч ирээд элдвээр ярих юм. Бүх л албан тушаал дээр байсан байж тэр үедээ хөгжүүлчихгүй яасан юм. Араас нь гарч ирээд олон юм ярих юм. Өнөөдөр Э.Батшугар гишүүн энд сууж байна. Аавдаа зарим юмнаас хол бай гэж хэлэх хэрэгтэй шүү Э.Батшугар гишүүн ээ. Өөрийнхөө телевизээр нэвтрүүлэг хийгээд цацах юм. Манай найман сайд ажил хийх гэж л засагт орсон шүү” хэмээн онцоллоо.
