18 настай Кай Трамп мэргэжлийн гольфын ертөнцөд анх удаа өрсөлдөнө
АНУ-ын Ерөнхийлөгч асан Дональд Трампын ач охин Кай Трамп ирэх арваннэгдүгээр сард болох LPGA-ийн хуваарьт “Annika” нэртэй мэргэжлийн гольфын тэмцээнд оролцох урилга авчээ.
18 настай Кай ирэх жилээс Майамигийн их сургуульд суралцах бөгөөд Америкийн Коллежийн Үндэсний Лиг (NCAA)-ийн гольфын төрөлд өрсөлдөхөөр бэлтгэлээ базааж байгаа юм.
“Annika” — дэлхийн шилдгүүдийн өрсөлдөөн
Кай Трамп ивээн тэтгэгчдийн урилгаар арваннэгдүгээр сарын 13-наас 16-ны хооронд АНУ-ын Флорида мужийн Pelican Golf Club-т болох нэр хүндтэй “Annika” тэмцээнд оролцоно. Уг тэмцээн нь АНУ-ын мэргэжлийн эмэгтэй гольфын холбоо (LPGA)-ийн хуваарьт багтдаг бөгөөд дэлхийн шилдэг эмэгтэй гольфчид оролцдог уламжлалтай.
Тэмцээний нийт шагналын сан 3.25 сая ам.доллар бөгөөд өнгөрсөн жил АНУ-ын шилдэг гольфчин Нелли Корда түрүүлж байжээ.
Соёлын нөлөө бүхий шинэ од
Кай Трамп нь Дональд Трампын ууган хүү Дональд Трамп Жуниорын охин юм. Тэрбээр зөвхөн спортын бус, цахим орчны нөлөөлөгчөөр нэр хүндтэй бөгөөд YouTube-д 1.3 сая, TikTok-д 3.4 сая, Instagram-д 2.5 сая дагагчтай.
Тэрбээр энэ жил өсвөрийн гурван гольфын тэмцээнд оролцож, охидын чансаагаар 461-т бичигдэж байсан бол одоо мэргэжлийн түвшинд анх удаа өрсөлдөх гэж байна.
Шинжээчдийн үзэж буйгаар, Кай Трампын “Annika” тэмцээний оролцоо нь түүний мэргэжлийн гольфын замналын эхлэл болж, цаашдын карьерийн томоохон туршлага болох юм.
