NBA “Лос-Анжелес Лейкерс”-ийн худалдах гэрээг баталлаа
Үндэсний сагсан бөмбөгийн холбоо (NBA)-ны удирдах зөвлөл “Лос-Анжелес Лейкерс” клубийн хувьцааны хяналтын багцыг худалдах гэрээг санал нэгтэйгээр дэмжсэн талаар тус холбооны хэвлэлийн алба мэдээлэв.
“TWG Global” компанийн гүйцэтгэх захирал Марк Уолтер клубийг 10 тэрбум ам.доллароор худалдаж авах бөгөөд энэ нь спортын түүхэнд хийгдсэн хамгийн өндөр үнийн дүнтэй гэрээ болох юм. Тус мэдээллийг “ESPN” телевиз зургаадугаар сарын 19-нд анх дамжуулжээ.
Гэрээний дэлгэрэнгүй ба одоогийн эзэд
Одоогийн эзэмшигч Бассын гэр бүл нийт хувьцааныхаа 15 орчим хувийг тодорхой хугацаанд хадгалах бол Жини Басс клубийг зарсныхаа дараа “Лейкерс”-ийн удирдлагын албан тушаалдаа үргэлжлүүлэн ажиллах аж.
Бассын гэр бүл 1979 оноос хойш “Лейкерс”-ийг удирдаж ирсэн бөгөөд тэдний удирдлагын дор баг 11 удаа NBA-ийн аваргын цом хүртэж байжээ.
Түүхэн дэх хамгийн өндөр үнийн гэрээ
Энэхүү худалдаа нь спортын түүхэнд урьд өмнө байгаагүй хамгийн үнэтэй худалдан авалт болж байна. Өмнөх дээд амжилтыг 2023 онд NFL-ийн “Вашингтон Коммандерс” клуб 6.05 тэрбум ам.доллараар, харин 2024 онд NBA-ийн “Бостон” клуб 6.1 тэрбум ам.доллараар зарагдсанаар тогтоож байв.
Марк Уолтер — спортын ертөнцийн хөрөнгө оруулагч
М.Уолтер 2021 онд Фил Аншутцаас “Лейкерс”-ийн 26 хувийн хувьцааг худалдан авч, хяналтын багцыг эзэмших эрхтэй болсон юм. Тэрбээр мөн дараах спортын байгууллагуудын эзэмшигч юм:
- “Лос-Анжелес Дожерс” — Үндэсний бейсболын лиг
- “Лос-Анжелес Спаркс” — Эмэгтэйчүүдийн NBA
- “Челси” — Английн хөл бөмбөгийн премьер лиг
- 2026 оноос “Формула-1”-ийн уралдаанд оролцох “Кадиллак” баг
Ийнхүү “Лейкерс”-ийг худалдах гэрээ нь дэлхийн спортын салбарт түүхэн шинэ хуудас нээж, Марк Уолтерийг хамгийн том спортын хөрөнгө оруулагчдын нэг болгож байна.
