Монгол Улсын уул уурхайн бүтээгдэхүүний экспорт сүүлийн саруудад эрчимтэй өсөж, гадаад валютын орох урсгалыг мэдэгдэхүйц нэмэгдүүлэв. Үүний зэрэгцээ төлбөрийн тэнцэл, гадаад худалдааны үзүүлэлтүүд сайжирч, банкны салбараар дамжих валютын гүйлгээний хэмжээ ч өссөн нь санхүүгийн гадаад орчныг улам тогтвортой болгож байна.
Экспортын өсөлт, өрийн удирдлага хоёрын нийлбэр үр дүн
Засгийн газар болон Монголбанкны хэрэгжүүлсэн өрийн удирдлагын бодлого гадаад нөөц нэмэгдэхэд чухал нөлөө үзүүлжээ. Суурь эдийн засгийн нөхцөл байдалтай уялдуулан:
- гадаад зах зээл дээр гаргасан бондуудыг дахин санхүүжүүлэх,
- өндөр дүнтэй гадаад зээлүүдийн эргэн төлөлтийг хугацаанд нь гүйцэтгэх
шийдлүүдийг амжилттай хэрэгжүүлснээр улсын гадаад өрийн дарамтыг бууруулж, хөрөнгө оруулагчдын итгэлийг нэмэгдүүлэх боломж бүрдсэн байна.
Ингэснээр Монгол Улсын зээлжих зэрэглэл сайжирч, олон улсын санхүүгийн зах зээлээс санхүүжилт татах нөхцөл илүү таатай болсон нь гадаад валютын орох урсгалыг дахин дэмжжээ.
6.0 тэрбум ам.долларын босго давсан нь юу хэлж байна вэ?
Монголбанкны мэдээлснээр, 2025 оны арванхоёрдугаар сарын 2-ны өдрийн эцэст гадаад валютын улсын нөөц 6,014.20 сая ам.долларт хүрсэн нь өмнө нь үзэгдэж байгаагүй, түүхэн дээд түвшин болж бүртгэгдлээ.
Гадаад валютын улсын нөөцийг ийнхүү тогтвортой өсгөж чадсан нь:
- гадаад өр, зээл, импортын төлбөрийг цаг хугацаанд нь саадгүй гүйцэтгэх чадварыг нэмэгдүүлж,
- гадаад шок, зах зээлийн савлагаанд өртөх эрсдэлийг бууруулж,
- хөрөнгө оруулагчид, зээлдүүлэгчдийн нүдэнд Монгол Улсын санхүүгийн “дархлааг” бэхжүүлж буй
чухал дохио болж байна.
Эдийн засаг, төгрөгийн ханшид үзүүлэх эерэг нөлөө
Гадаад валютын улсын нөөц нэмэгдэх нь дотоодын эдийн засаг, санхүүгийн зах зээлд шууд ба шууд бусаар олон талын эерэг нөлөө үзүүлнэ. Нэн ялангуяа:
- Монголбанкны үндсэн зорилт болох төгрөгийн тогтвортой байдлыг хангахад түлхэц өгнө
- Вальютын ханшийн огцом хэлбэлзлийг сааруулах, шаардлагатай үед зах зээлд оролцон тэнцвэржүүлэх нөөц боломжийг өргөтгөнө
- Эдийн засгийн тогтвортой орчныг сайжруулж, хөрөнгө оруулалтын урсгалыг татахад дэмжлэг үзүүлнэ
хэмээн мэргэжилтнүүд онцолж байна.
Ингэснээр уул уурхайн экспортын сэргэлт, өрийн удирдлагын бодлогын үр дүн, зээлжих зэрэглэлийн ахиц гурвын нийлбэр нь Монгол Улсын гадаад валютын “аюулгүйн дэр”-ийг түүхэндээ анх удаа 6 тэрбум долларын түвшинд гаргаж чадлаа.
