“Alpha Gaming” PMGC 2025-т 3-р байр эзэлж, TOP онцгойров
Энэ жил Монголын цахим спортын тамирчид олон улсын тэмцээнүүдэд амжилтаар дүүрэн байгаа бөгөөд үүний нэг тод жишээ нь PUBG MOBILE-ын дэлхийн аварга шалгаруулах “PUBG Mobile Global Championship 2025” тэмцээн байлаа. Тус тэмцээнд манай улсын “Alpha Gaming” баг гуравдугаар байр эзэлж, 199,000 ам.долларын шагнал хүртсэн байна.
“Alpha Gaming” баг нь Хятад эзэнтэй бөгөөд энэ оны тавдугаар сард хуучнаар “4Merical Vibes” багийн тамирчдыг эгнээндээ нэгтгэснээр Монголыг төлөөлөн томоохон уралдаан тэмцээнүүдэд тогтмол оролцож эхэлсэн гэж мэдээлжээ. Энэ удаагийн дэлхийн аваргад манай тамирчид Азийн багуудын хувьд оргил амжилтыг үзүүлсэн гэж онцолж, тэр дундаас “Alpha Gaming” багийн тамирчин TOP буюу А.Бүрэнбаяр “PUBG Mobile Global Championship-2025” тэмцээний шилдэг тоглогчоор шалгарсан нь хамгийн анхаарал татсан үйл явдал болсон байна.
Түүний шилдэг тоглогчийн шагналд 88,000 ам.долларын үнэ бүхий Porsche Cayenne маркийн автомашин дагалдаж байгаа аж. Ингэснээр А.Бүрэнбаяр дэлхийн аваргын шилдэг тоглогчийн цолыг хоёр дахь удаагаа хүртэж буй нь онцлох амжилт болов.
А.Бүрэнбаярын өмнөх амжилтууд ба Монголын түүхэн оргил жилүүд
А.Бүрэнбаяр 2020 онд PUBG MOBILE тоглоомын албан ёсны мэргэжлийн тамирчин болж, томоохон тэмцээнүүдийн шилдэг тоглогчоор удаа дараа нэрлэгдэж ирсэн нэгэн юм. Тэрбээр мөн 2022 оны дэлхийн аварга шалгаруулах тэмцээнд шилдэг тоглогчоор шалгарч байсан бөгөөд тухайн үед “Stalwart esports” багийн бүрэлдэхүүнд тоглож байжээ. Энэ нь цахим спортын дэлхийн аваргын шилдэг тоглогч болсон анхны монгол тамирчин гэдгээрээ онцлогт тооцогддог.
Мөн Монголын цахим спортын оргил амжилтуудын нэг 2023 онд тохиож, “IHC esports” баг PUBG MOBILE-ын дэлхийн аваргад түрүүлж, “Stalwart esports” баг дэд байрт шалгарч байсан тухай мэдээллийг давхар дурдсан байна.
