УИХ дахь Ардчилсан намын (АН) бүлгийн ээлжит хуралдаанаар Засгийн газрын асуудал, хэвлэлийн эрх чөлөөний хэрэгжилт, уул уурхайгаас үүдэлтэй өвчлөл болон бүлгийн удирдлагын бүтцийн өөрчлөлтийг хэлэлцэж, тодорхой асуудлуудаар ажлын хэсэг байгуулах шийдвэр гаргалаа. Мөн тус хуралдаанаар өмнө нь дэд даргаар ажиллаж байсан УИХ-ын гишүүн Б.Жаргалан, Ч.Лодойсамбуу нарыг чөлөөлөгдөх хүсэлтийнх нь дагуу үүрэгт ажлаас нь чөлөөлж, УИХ-ын гишүүн Р.Сэддорж, Ж.Баярмаа, Ш.Бямбасүрэн, Г.Хосбаяр нарыг бүлгийн дэд даргаар шинээр сонгосон байна.
Засгийн газрыг огцруулах бичиг ба хамтрах тухай цуурхал
Хурлын дараа УИХ дахь АН-ын бүлгийн дарга Б.Түвшин мэдээлэл хийхдээ Ардчилсан нам Засгийн газарт нэгдэх гэж байгаа тухай яриаг эрс няцаалаа. Тэрбээр “Одоогоор Засгийн газарт орох, хамтрах тухай нэг ч яриа хэлцэл яваагүй. Бид энэ мэт цуурхлыг дагаж ажил цалгардуулахгүй, эх сурвалжийг нь нягтална” гэдгийг мэдэгдэв.
Мөн Засгийн газрыг огцруулах санаачилгын хүрээнд намын дарга О.Цогтгэрэл гишүүдийн гарын үсгийг цуглуулж эхэлсэн бөгөөд одоогоор 41 гишүүн гарын үсэг зураад байгааг дурдав. Харин уг огцруулах бичгийг парламентын даргад хэзээ өргөн барих асуудлыг хувь гишүүд бус, намын Улс төрийн зөвлөл эцэслэн шийдвэрлэхээр тогтсон байна.
Төрийн хэвлэл мэдээллийн алба ба татвар төлөгчдийн мөнгө
Тус хуралдаанаар Хэвлэлийн эрх чөлөөний тухай хуулийн хэрэгжилт хангалтгүй байгааг хөндөж, хэвлэл мэдээллийн хэрэгслийн хараат бус байдлыг хамгаалах чиглэлээр ажлын хэсэг байгуулахаар болжээ.
УИХ-ын гишүүн Ж.Баярмаа энэ талаар тайлбарлахдаа “Төрийн бүх байгууллага дэргэдээ хэвлэлийн албатай болж, энэ нь хараат бус хэвлэл мэдээллийн зах зээлийг хумих эрсдэл үүсгэж байна. Тухайлбал, Нийслэл 20 хүний бүрэлдэхүүнтэй хэвлэлийн бүтэц ажиллуулж, татвар төлөгчдийн мөнгөөр эрх баригчдын алдааг хаацайлдаг тролл ажиллуулж байна гэх иргэдийн мэдээлэл байна. Төр татвар төлөгчдийн мөнгөөр өөрийгөө магтан дуулж буй эсэхэд, гэрээт хэвлэлүүд нь шүүмжлэлээс татгалзан нэг талыг барьж байгаа эсэхэд сөрөг хүчний хувьд хатуу хяналт тавина” хэмээн байр сууриа илэрхийллээ.
Байгаль орчин, хариуцлагын асуудал
Түүнчлэн хуралдаанаар уул уурхайн бүс нутгуудад элэг, уушги болон хавдрын өвчлөл эрс нэмэгдэж буй шалтгаан, нөхцөлийг судлах, Нөмрөгийн түймрийн асуудалд хариуцлага тооцох үйл явцыг нуун дарагдуулахгүй байх үүднээс Ардчилсан намаас дахин тусгай ажлын хэсэг гарган ажиллахаар шийдвэрлэсэн байна.
Энэхүү шийдвэрүүд нь сөрөг хүчний зүгээс парламентын түвшинд хяналт шалгалтыг чангатгаж, төсвийн үр ашиггүй зарцуулалт болон засаглалын ил тод байдалд бодитой шахалт үзүүлэхэд чиглэж байна. Бүлгийн шинэ удирдлагын бүрэлдэхүүн цаашид Засгийн газрын хариуцлагын асуудлыг улс төрийн түвшинд шийдвэрлэх хүртэл хэвлэлийн эрх чөлөө, иргэдийн эрүүл мэндтэй холбоотой ноцтой сэдвүүдэд байр сууриа тууштай хадгалах төлөвтэй байна.
