Үндэсний эрх чөлөө, тусгаар тогтнолоо сэргээн мандуулсны 114 жилийн ойд зориулсан “Ерөнхийлөгчийн цом”-ын төлөөх чансаа өндөр 128 бөхийн барилдаан өнөөдөр Монгол бөхийн өргөөнд боллоо. Тус барилдаанд улсын арслан Б.Орхонбаяр долоо даван түрүүлж, аймгийн арслан М.Баяржавхлан үзүүрлэлээ.
Улсын цолтой 58 бөх оролцсон өргөн бүрэлдэхүүн
Энэ удаагийн барилдаанд улсын аварга П.Бүрэнтөгс, О.Хангай, улсын арслан Ц.Содномдорж, Б.Орхонбаяр, Э.Оюунболд, Ц.Бямба-Отгон, Р.Пүрэвдагва, Э.Батмагнай, улсын заан Б.Пүрэвсайхан, Н.Жаргалбаяр, Б.Бат-Өлзий зэрэг нэр бүхий бөхчүүд хүч сорив. Нийтдээ улсын цолтой 58 бөх барилдсан бөгөөд бүртгэлээр улсын аварга хоёр, улсын арслан зургаа, улсын заан 9, улсын харцага 16, улсын начин 25 бөх зодоглосон байна.
Тавын даваанд найман хүчтэн үлдэв
Барилдааны тавын даваанд улсын арслан Б.Орхонбаяр, Ц.Бямба-Отгон, улсын заан Б.Пүрэвсайхан, Б.Зоригтбаатар, Н.Жаргалбаяр, Б.Бат-Өлзий, аймгийн арслан Д.Алтанцоож, М.Баяржавхлан нарын найман бөх үлдлээ. Энэ даваанд улсын заан Б.Бат-Өлзий, улсын харцага Б.Зоригтбаатар нар онцлох тулаан хийсэн байна.
Шөвгийн дөрөв: Орхонбаяр, Баяржавхлан үзүүр түрүүнд шалгарлаа
Шөвгийн дөрөвт улсын арслан Б.Орхонбаяр аймгийн арслан Д.Алтанцоожийг давж, аймгийн арслан М.Баяржавхлан улсын заан Б.Бат-Өлзийг хожсоноор үзүүр, түрүүний барилдаанд үлдсэн юм.
Давааны оноолтууд
Тавын даваа
Улсын арслан Б.Орхонбаяр – улсын заан Н.Жаргалбаяр
Улсын арслан Ц.Бямба-Отгон – аймгийн арслан М.Баяржавхлан
Улсын заан Б.Пүрэвсайхан – аймгийн арслан Д.Алтанцоож
Улсын заан Б.Бат-Өлзий – улсын харцага Б.Зоригтбаатар
Зургаагийн даваа
Улсын арслан Б.Орхонбаяр – аймгийн арслан Д.Алтанцоож
Улсын заан Б.Бат-Өлзий – аймгийн арслан М.Баяржавхлан
Долоогийн даваа
Улсын арслан Б.Орхонбаяр – аймгийн арслан М.Баяржавхлан
