Австралийн Нээлттэй тэмцээнд урилгаар эргэн ирнэ
Дэлхийн чансааг эзэгнэж явсан Америкийн алдарт теннисчин Винус Уильямс 2026 оны Австралийн аварга шалгаруулах Нээлттэй тэмцээнд урилгаар (wild card) оролцохоор боллоо. Түүний нэрийг тэмцээнийг зохион байгуулагчдын албан ёсны цахим хуудсаар дамжуулан зарласан байна.
Энэ шийдвэр нь WTA турнирүүдэд тогтмол оролцдоггүй болсон ч Винусыг дахин Их дуулгын тайзнаа харах боломжийг нээж өгч байна.
Сүүлийн тоглолт ба тэмцээний тов
Винус Уильямс хамгийн сүүлд өнгөрсөн оны наймдугаар сард Эмэгтэй теннисчдийн холбооны (WTA) тэмцээнд оролцож, эхний тойрогт Чехийн Каролина Муховатай тулсан. Уг тоглолтод тэр 3:6, 6:2, 1:6 харьцаагаар ялагдсан байдаг.
Австралийн Нээлттэй тэмцээн (Australian Open) энэ жил нэгдүгээр сарын 18-наас хоёрдугаар сарын 1-ний хооронд зохион байгуулагдана. Винус урилгаар оролцох шийдвэрээ хүлээн зөвшөөрснөөр Мельбурнд дахин нэг удаа Их дуулгын талбайд гарна.
Их дуулгын болон олимпын карьерын гол амжилтууд
Өдгөө 45 настай Винус Уильямс эмэгтэйчүүдийн теннисний түүхэнд олон дээд амжилтыг нэр дээрээ бичүүлсэн домогт тоглогчдын нэг хэвээр байна. Түүний амжилтуудын гол хэсгийг дурдвал:
- Уимблдоны ганцаарчилсан төрөлд 5 удаа түрүүлсэн.
- АНУ-ын аварга шалгаруулах Нээлттэй тэмцээнд ганцаарчилсан төрөлд 2 удаа түрүүлсэн.
- Их дуулгын нийт 14 тэмцээнд дүү Серена Уильямстайгаа хосын төрөлд түрүүлсэн.
- 2000 оны Сиднейн олимпын наадамд ганцаарчилсан төрөлд алтан медаль хүртсэн.
- 2000, 2008, 2012 оны олимпын наадмуудад Серенатайгаа хамт хосын төрөлд дахин 3 алтан медаль авсан.
Эдгээр үзүүлэлт нь Винусыг зөвхөн Америкийн төдийгүй дэлхийн эмэгтэйчүүдийн теннисний түүхэн дэх нөлөө бүхий тоглогчдын нэг болгосон.
Australian Open-д тоглох хамгийн ахмад тамирчин болно
Australian Open-ий зохион байгуулагчдын урилгыг хүлээн авснаар Винус Уильямс 45 нас 7 сартайдаа тус тэмцээнд оролцож, тэмцээний түүхэн дэх хамгийн ахмад оролцогч тамирчин болж бичигдэнэ. Тэрбээр өмнө нь Австралийн Нээлттэй тэмцээний эмэгтэй ганцаарчилсан төрөлд хоёр удаа финалд шалгарч байсан туршлагатай.
Өмнөх дээд амжилтыг Японы теннисчин Кимико Датэ эзэмшдэг байсан. Тэрээр 2015 онд 44 нас 3 сартай байхдаа Australian Open-д оролцож, тухайн үед хамгийн ахмад оролцогчоор тэмдэглэгдэж байлаа. Ингэснээр Винус түүний тогтоосон насны “рекордыг” даван гарч, Их дуулгын тайзанд нас, туршлага хоёр хэрхэн зэрэгцэн оршиж болдгийг дахин нотлон харуулах гэж байна.
