Спортын төв ордонд дөрвөн өдрийн тэмцээн эхлэв
Сонгомол болон чөлөөт бөхийн насанд хүрэгчдийн улсын аварга шалгаруулах тэмцээн Улаанбаатар хотын Спортын төв ордонд албан ёсоор эхэллээ. Тэмцээн дөрвөн өдөр үргэлжлэх бөгөөд энэ удаагийн УАШТ-ийг 1980 оны Москвагийн зуны XXII олимпын мөнгөн медальт, Монгол Улсын гавьяат тамирчин, нэрт бөх Ж.Даваажавын нэрэмжит болгон зохион байгуулж буй нь онцлог юм. Ингэснээр Ж.Даваажавын Монголын бөхийн хөгжилд оруулсан хувь нэмэр, спортын түүхэнд үлдээсэн гавьяа зүтгэлийг хойч үед нь мөнхжүүлж байгаа гэж үзэж байна.
Сонгомол бөхийн эхний өдрийн медальтнууд тодорлоо
Тэмцээний эхний өдөр сонгомол бөхийн медальтнууд тодорч, олимпын зургаан жинд нийт 90 орчим тамирчин өрсөлдсөн байна.
Жингийн аваргууд:
- 60 кг: М.Даваабанди
- 67 кг: Ц.Отгоннасан
- 77 кг: Б.Ууганбаяр
- 87 кг: Г.Төрболд
- 97 кг: Г.Ганхуяг
- 130 кг: Б.Намбардагва
Эдгээрээс 60 кг-ын М.Даваабанди, 87 кг-ын Г.Төрболд нар улсын аваргын алтан медалиа хоёр дахь удаагаа хүртжээ. Харин 67 кг-ын Ц.Отгоннасан, 77 кг-ын Б.Ууганбаяр, 97 кг-ын Г.Ганхуяг, 130 кг-ын Б.Намбардагва нар улсын аваргаас анхны түрүүгээ авсан байна.
Багийн дүн:
- “Цаст тайга” клуб (дасгалжуулагч С.Мөнхсүх): 96 оноо
- “Алдар” спорт хороо (дасгалжуулагч Г.Мандахнаран)
- Баянхонгор аймгийн “Байдрагийн хүчтэн” дэвжээ (дасгалжуулагч С.Мөнхдуулдах)
Өнөөдөр чөлөөтийн жингүүд үргэлжилж, медальтнууд тодорно
Өнөөдөр чөлөөт бөхийн эрэгтэйчүүдийн 57, 61, 65 кг, эмэгтэйчүүдийн 53, 62, 76 кг-ын жингийн барилдаанууд болж, тухайн өдрийн медальтнууд тодрох хуваарьтай. Энэ жилийн чөлөөт бөхийн тэмцээнд 250 орчим тамирчин оролцож байна.
Энэхүү УАШТ нь зөвхөн улсын аваргуудыг тодруулах тэмцээнээр хязгаарлагдахгүй, Монголын шигшээ багийн бүрэлдэхүүнийг тодорхойлоход нөлөөлөхөөс гадна чөлөөт, сонгомол бөхийн хөгжлийн чиг хандлагыг харуулах ач холбогдолтой гэж үзэж байна.
