Интернетэд алдаршсан бяцхан макакагийн талаар тайлбар хийжээ
Японы Токио хотын ойролцоох Ичикава хотын амьтны хүрээлэн интернетэд алдаршсан бяцхан сармагчин Панчийг бусад сармагчингууд дээрэлхэж байгаа гэх шүүмжлэлийг няцаалаа.
Долоон сартай япон макака сармагчин Панч эхдээ хаягдсаны дараа амьтны хүрээлэнд амьдрах болсон юм. Тэрээр IKEA брэндийн чихмэл орангутан тоглоомыг тэвэрч буй бичлэг цахим орчинд тарснаар дэлхий даяар олны анхаарлыг татсан.
Зарим бичлэг хүмүүсийн санаа зовнилыг төрүүлсэн
Сошиал сүлжээнд тарсан зарим бичлэгт бусад сармагчингууд Панчийг хөөж байгаа мэт харагдсан нь хүмүүсийн санаа зовнилыг нэмэгдүүлсэн.
Гэсэн ч өөр бичлэгүүдэд сүргийн бусад гишүүд түүнийг хамгаалж, асарч байгаа нь мөн харагддаг.
Хоёрдугаар сард амьтны хүрээлэн Панчийг бусад сармагчингууд “олон удаа зандарсан ч ноцтой довтолгоо хийгээгүй” гэж мэдэгдэж байсан. Харин сүүлд дахин ижил төстэй бичлэгүүд интернетэд тархсанаар олон нийтийн анхаарал дахин нэмэгдсэн байна.
Япон макака сармагчин шаталсан нийгэмтэй
Гуравдугаар сарын 10-нд гаргасан мэдэгдэлдээ амьтны хүрээлэн Япон болон гадаадын олон хүнээс санаа зовсон санал, асуулт ирсэн гэдгийг дурджээ.
Тэд тайлбарлахдаа япон макака сармагчингууд маш хатуу шаталсан нийгмийн бүтэцтэй бөгөөд дээд байр суурьтай сармагчингууд доод байр суурьтай гишүүддээ “сахилга бат тогтоох” үйлдэл хийдэг гэдгийг онцолсон байна.
Амьтны хүрээлэнгийн тайлбараар энэ нь хүний ойлголтоор хүчирхийлэлтэй адил зүйл биш бөгөөд сармагчингуудын байгалийн зан үйл юм.
Судлаачид ийм зан үйл хэвийн гэж үздэг
Японы приматологичид 1948 оноос хойш Японы уугуул сармагчингуудын зан байдал, нийгмийн бүтэц, экологийг судалж ирсэн. Судалгаагаар ийм төрлийн сахилгын зан үйл нь сармагчингуудын нийгэмд байгалиасаа байдаг бөгөөд зөвхөн Панчийн сүрэгт тохиолдож буй онцгой зүйл биш гэж тайлбарлажээ.
Панч ихэнх цагийг тайван өнгөрүүлдэг
Амьтны хүрээлэнгийн мэдээлснээр Панч өдрийн ихэнх хугацааг тайван өнгөрүүлдэг бөгөөд түүнд чиглэсэн сахилгын үйлдэл байнга тохиолддоггүй аж.
Мөн Панчтай тоглож, асрах сармагчингуудын тоо нэмэгдэж байгаа бөгөөд үүний улмаас түүний чихмэл тоглоомоос хол байх хугацаа ч уртассан байна.
Гэсэн хэдий ч зарим “өндөр зэрэглэлтэй” сармагчингууд илүү түрэмгий хандсан тул амьтны хүрээлэн гуравдугаар сарын 8-нд тэднийг түр хугацаанд сүргээс салгаж, ажиглаж эхэлжээ.
Панчийг сүргээс салгах боломжгүй гэж үзэж байна
Амьтны хүрээлэн Панчийн амь насанд аюул учруулахуйц довтолгоо болсон нотолгоо байхгүй гэдгийг мэдэгдсэн.
Зарим хүмүүс Панчийг бүрэн тусгаарлах санал гаргасан ч амьтны хүрээлэн үүнийг зөвшөөрөхгүй байгаа аж.
Учир нь Панч энэ сүрэгт амьдрахад аль хэдийн дассан бөгөөд одоо салгавал дахин сүрэгтээ нэгдэх боломжгүй болж, насан туршдаа ганцаараа амьдрах эрсдэлтэй гэж тайлбарласан байна.
PETA байгууллага шүүмжилжээ
Харин амьтны эрхийн PETA байгууллага энэ асуудлыг шүүмжилсэн байр суурь илэрхийлжээ.
Тус байгууллагын Азийн бүсийн ерөнхийлөгч Жэйсон Бэйкер:
“Амьтны хүрээлэн бол амьтдын хоргодох газар биш. Энэ бол тэднийг эрх чөлөөгүйгээр, байгалийн орчноос нь салгаж хорьж байдаг газар” гэж мэдэгдсэн байна.
Мөн интернетэд алдартай болсон ч амьтны олзлогдсон амьдралын бодит байдлыг өөрчилдөггүй гэдгийг нэмж хэлжээ.
