Сингапурын тэмцээнд Австрали, Шинэ Зеландын багууд түрүүлэв
3×3 сагсан бөмбөгийн тивийн аварга шалгаруулах тэмцээн өнгөрсөн амралтын өдрүүдэд болж, Сингапур Улсад тивийн шилдэг багууд аваргын төлөө өрсөлдлөө.
Энэ удаагийн тэмцээнд эрэгтэй ангилалд Шинэ Зеландын баг анх удаа түрүүлсэн бол эмэгтэй ангилалд Австралийн баг дахин аваргалж, амжилтын цуваагаа үргэлжлүүлэв. Австралийн эмэгтэй шигшээ ийнхүү тивийн тэмцээнээс найм дахь медалиа хүртэж, сүүлийн дөрвөн жил дараалан аваргын цом өргөсөн амжилтаа баталгаажууллаа.
Австралийн тэргүүлсэн хэсгээс хоёрдугаар байраар шалгарсан Филиппиний баг хасагдах шатанд хүчтэй тоглолт үзүүлсэн байна. Тэд эхлээд Монголын багийг 15:12-оор хожиж, дараа нь хагас шигшээд Японы багийг 21:19-өөр буулган авсан. Харин шигшээ тоглолтод Австралийн багт 9:18-аар дийлдсэнээр тивийн аваргаас түүхэн дэх анхны мөнгөн медалиа зүүлээ.
Харин хүрэл медалийн төлөөх тоглолтод БНХАУ-ын эмэгтэй баг Японыг 20:15-аар ялж, тивийн аваргын зургаа дахь медаль, дөрөв дэх хүрлээ хүртсэн байна.
Монгол тавдугаар байр эзэлж, дараагийн тивийн тэмцээн Улаанбаатарт болно
Эрэгтэйчүүдийн ангилалд Шинэ Зеландын баг хамгийн тод амжилтыг үзүүлэв. Тэд аваргаа хамгаалж байсан Австралийн багийг хасагдах шатны эхний тойрогт 21:16-гаар ялж, хагас шигшээд Японы багийг мөн 21:16-гаар буулган авсан. Улмаар аваргын төлөөх тоглолтод БНСУ-ын багийг 21:15-аар илүүрхэж, түүхэн дэх анхны түрүүгээ авлаа.
БНХАУ-ын эрэгтэй баг ч медальтай өндөрлөсөн бөгөөд хүрлийн төлөө Японыг 22:20-оор хожсоноор тивийн аваргаас дөрөв дэх медалиа, гурав дахь хүрлээ хүртэв.
Монголын багийн хувьд эхний шатанд Японы багт ялагдсанаар тэмцээнийг тавдугаар байрт дуусгасан байна.
3×3 сагсан бөмбөгийн тивийн аварга шалгаруулах тэмцээн ийнхүү таван жил дараалан Сингапур Улсад зохион байгуулагджээ. Харин ирэх жилийн тивийн аваргыг Монгол Улсын нийслэл Улаанбаатар хот хүлээн авах юм. Манай улс өмнө нь 2017 онд тивийн аваргын хоёр дахь удаагийн тэмцээнийг зохион байгуулж байсан туршлагатай тул дараагийн тэмцээн Улаанбаатарт болох нь онцгой анхаарал татаж байна.
