Э.Цэндбаатар WBC холбооны мөнгөн бүсийн төлөө тавдугаар сарын 1-нд рингэнд гарна

Өрсөлдөгч нь тулаанаа цуцалсны дараа Монголын тамирчин шууд бүсийн төлөөх тулаанд дэвшлээ

Мэргэжлийн боксын рингэнд амжилттай хүч үзэж буй Монгол Улсын гавьяат тамирчин Э.Цэндбаатар ирэх тавдугаар сарын 1-нд WBC холбооны мөнгөн бүсийн төлөө тулалдахаар боллоо.

Тэр анх дөрөвдүгээр сарын 10-нд ProBox холбооны хүрээнд Тажикистаны боксчин Мухаммедхуча Ягубовтой ээлжит тулаанаа хийхээр товлогдоод байсан юм. Гэвч өрсөлдөгч нь тодорхой шалтгааны улмаас тулаанаасаа татгалзсанаар нөхцөл байдал өөрчлөгдөж, Э.Цэндбаатарыг бүсийн төлөө шууд тулалдуулах шийдвэр гарсан талаар тэр өөрийн цахим хуудсаар дамжуулан өмнө нь мэдээлж байв.

Тэгвэл ProBox холбоо шинэ тулааны товыг албан ёсоор зарлажээ. Орон нутгийн цагаар тавдугаар сарын 1-ний Баасан гарагт АНУ-ын Мэрилэнд мужийн Хановер хотод Э.Цэндбаатар Барбадосын боксчин Кобиа Бредитэй WBC холбооны мөнгөн бүсийн төлөө тулалдах юм.

Туршлагатай Кобиа Бреди бүс эзэмшигчээр рингэнд гарч, Э.Цэндбаатар чансаагаар илүү өндөрт бичигдэж байна

Кобиа Бреди мэргэжлийн бокст 19 тулаан хийхдээ 18 ялалт байгуулсан амжилттай тамирчин юм. Тэр өнгөрсөн оны аравдугаар сард Гайанагийн Декстер Маркесийг гуравдугаар үеийн дараа хүнд цохилтоор ялж, WBC холбооны мөнгөн бүсийг эзэмшсэн байна. Ирэх аравдугаар сард 35 нас хүрэх энэ тамирчин өмнө нь эх орноо төлөөлөн олимпын наадамд оролцож байсан туршлагатай нэгэн аж.

Харин Boxrec чансаагаар Э.Цэндбаатар 14 ялалттай амжилтаараа 12 дугаарт бичигдэж байгаа бол түүний ирэх өрсөлдөгч Кобиа Бреди 68 дугаарт эрэмбэлэгдэж байна. Ийнхүү Монголын боксчин чансааны өндөр байраа батлан, мэргэжлийн замналынхаа хамгийн чухал тулаануудын нэгэнд бэлтгэж эхэллээ.