Монгол Улсын эрчим хүчний салбарт томоохон ахиц гарлаа. Бөөрөлжүүт цахилгаан станцын 150 МВт-ын хүчин чадалтай II блок ашиглалтад орж, өнөөдрөөс эхлэн Төвийн нэгдсэн системд цахилгаан эрчим хүч нийлүүлж эхэллээ.
Хөрөнгө оруулалт ба эхний шатны үр дүн
Улаанбаатар хот анх удаа дотоодын хөрөнгийн зах зээлд 500 тэрбум төгрөгийн бонд арилжаалсан бөгөөд үүний 300 тэрбум төгрөгийг Бөөрөлжүүт цахилгаан станцад хөрөнгө оруулсан юм.
Үүний үр дүнд эхний 150 МВт-ын хүчин чадалтай блокийг 2024 оны 12 дугаар сард ашиглалтад оруулж, Төвийн бүсийн эрчим хүчний системд холбосон билээ.
II блок төлөвлөснөөс өмнө ашиглалтад орлоо
Харин тус станцын хоёрдугаар блокийн барилга угсралт, туршилт тохируулгын ажил бүрэн дуусч, төлөвлөсөн хугацаанаасаа сар гаруйн өмнө буюу 2025 оны 10 дугаар сарын 18-ны өдрийн 08:00 цагаас эхлэн төвийн системд холбогдож цахилгаан нийлүүлж эхэлсэн байна.
Ингэснээр Бөөрөлжүүт цахилгаан станц нийт 300 МВт хүчин чадлаар ажиллаж, Монгол Улсын эрчим хүчний системд тогтмол цахилгаан нийлүүлэх болсон юм.
Монголын эрчим хүчний хангамжид оруулах хувь нэмэр
Энэхүү хүчин чадлаар ажилласнаар станц:
- 963 мянган айл өрхийн цахилгаан хэрэглээг хангах хэмжээний эрчим хүч үйлдвэрлэнэ.
- Жил бүр 2.4 тэрбум кВт.цаг хүртэл цахилгаан эрчим хүч үйлдвэрлэх боломжтой болно.
Энэ нь Монгол Улсын эрчим хүчний хангамжийг дотоодоос хангах стратегийн зорилтод чухал хувь нэмэр оруулж буй томоохон алхам юм.
