COP17-ийн үеэр “Нарлаг Монголын малчин” хөтөлбөрийг олон улсын түншүүдтэй хэрэгжүүлэхээр тохиролцлоо

Н.Учрал Ясмин Фуадтай уулзав

Ерөнхий сайд Н.Учрал Цөлжилттэй тэмцэх тухай НҮБ-ын конвенцын гүйцэтгэх нарийн бичгийн дарга Ясмин Фуадыг өнөөдөр Төрийн ордонд хүлээн авч уулзжээ.

Уулзалтын үеэр Монгол Улсад наймдугаар сарын 17-ноос эхэлсэн Цөлжилттэй тэмцэх тухай НҮБ-ын конвенцын Талуудын 17 дугаар бага хурал буюу COP17-ийн эхний өдрүүдийн явц, зохион байгуулалт, цаашдын хамтын ажиллагааны талаар санал солилцсон байна.

Бэлчээр, малчдын асуудлыг олон улсын түвшинд гаргахыг зорьж байна

2026 онд Монгол Улс “Олон улсын бэлчээр ба нүүдлийн мал аж ахуй эрхлэгчдийн жил”-ийг тэмдэглэж байгаа бөгөөд үүнтэй зэрэгцэн COP17 олон улсын бага хурлыг зохион байгуулж байна.

Ерөнхий сайд Н.Учрал энэ боломжийг ашиглан бэлчээр, малчдын асуудалд олон улсын түвшинд бодлогын манлайлал үзүүлэх, мөн санхүүжилт, хөрөнгө оруулалт татах чиглэлд идэвхтэй ажиллах сонирхолтой байгаагаа илэрхийлжээ.

Монголын хувьд бэлчээрийн доройтол, ган, хөрсний асуудал нь зөвхөн дотоодын сорилт бус, уур амьсгалын өөрчлөлт, хүнсний аюулгүй байдал, нүүдлийн мал аж ахуйн ирээдүйтэй холбоотой олон улсын анхаарах сэдэв болж байна.

1.29 тэрбум ам.долларын хөрөнгө оруулалт босгохоор тохиролцжээ

Конвенцын гүйцэтгэх нарийн бичгийн дарга Ясмин Фуад Монгол Улс газар, хөрс сэргээх болон бэлчээрийн асуудлаар олон улсын тавцанд манлайлж ирснийг онцолсон байна.

Түүний мэдээлснээр, COP17-ийн хүрээнд 170 гаруй улсын төлөөлөгч, хувийн хэвшил, олон улсын байгууллагууд оролцож, хөрс, бэлчээр, гангийн чиглэлээр тулгамдсан асуудлыг шийдвэрлэхэд чиглэсэн 60 гаруй төслийн талаар хэлэлцжээ.

Эдгээр төсөл таван тивийн 23 улсад хэрэгжихээр төлөвлөгдөж байгаа бөгөөд нийт 1.29 тэрбум ам.долларын хөрөнгө оруулалт босгохоор тохиролцсон байна.

“Нарлаг Монголын малчин” үндэсний жишиг хөтөлбөр болно

Ерөнхий сайд Н.Учрал Ясмин Фуад болон Конвенцын нарийн бичгийн дарга нарын газрын хамт олонд дэмжлэг үзүүлж буйд талархал илэрхийлжээ.

Уулзалтын үеэр “Нарлаг Монголын малчин” хөтөлбөрийг COP17-ийн “Эх байгалиа сэргээе. Итгэл найдвараа бадраая” үзэл санаатай уялдуулан үндэсний түвшний жишиг хөтөлбөр болгон хэрэгжүүлэхээр тохиролцсон байна.

Уг хөтөлбөрийг Конвенцын нарийн бичгийн дарга нарын газар болон олон улсын бусад түншүүдтэй хамтран хэрэгжүүлэхээр төлөвлөжээ. Энэ нь малчдын амьдрал, бэлчээрийн тогтвортой ашиглалт, уур амьсгалын өөрчлөлтөд дасан зохицох чадавхыг сайжруулахад чиглэсэн чухал алхам болох төлөвтэй байна.

COP17-ийн зохион байгуулалтыг өндрөөр үнэлэв

Ясмин Фуад COP17 бага хурлын зохион байгуулалт өндөр түвшинд байгааг онцолсон байна. Мөн Монгол Улс энэхүү олон улсын арга хэмжээнд онцгой ач холбогдол өгч, идэвхтэй оролцож байгаад олон улсын хамтын нийгэмлэг талархаж буйг илэрхийлжээ.

Ийнхүү COP17-ийн хүрээнд Монгол Улс зөвхөн хурал зохион байгуулагч орон төдийгүй бэлчээр, малчид, хөрсний доройтол, цөлжилттэй тэмцэх чиглэлээр олон улсын бодлогын хэлэлцүүлэгт идэвхтэй оролцогч, санаачлагч байр сууриа бататгаж байна.