Дуучны зургийг телевизийн савлагаанд ашигласан гэх маргаан гарлаа
Дэлхийд алдартай дуучин Dua Lipa технологийн томоохон компани Samsung-ийн эсрэг 15 сая ам.долларын нөхөн төлбөрийн нэхэмжлэл гаргаж, шүүхийн ажиллагаа эхлүүлжээ.
Мэдээллээр Samsung өнгөрсөн оноос худалдаанд гаргасан зарим телевизийн картон сав баглаа боодол дээр Dua Lipa-ийн зургийг ашигласан байна. Харин дуучны тал энэ нь түүний дүр төрхийг зөвшөөрөлгүйгээр арилжааны зорилгоор ашигласан үйлдэл гэж үзэж байгаа аж.
Зураг ашиглахаа зогсоох хүсэлтийг үл тоосон гэжээ
Dua Lipa-ийн тал уг асуудлыг мэдсэний дараа түүний дүр төрхийг зөвшөөрөлгүй ашиглахаа зогсоохыг Samsung-аас шаардсан байна.
Гэвч компанийн зүгээс энэ хүсэлтийг “үл тоосон, хүйтэн хандлагаар” хүлээж авсан гэж нэхэмжлэлд дурджээ. Үүний улмаас дуучны тал асуудлыг шүүхээр шийдвэрлүүлэхээр болсон байна.
Хэрэглэгчдийн сэтгэгдлийг нотлох баримтаар оруулжээ
Нэхэмжлэлд тухайн зураг бүтээгдэхүүний борлуулалтад нөлөөлсөн байж болзошгүйг харуулахын тулд X платформ дахь хэрэглэгчдийн сэтгэгдлийг мөн хавсаргасан байна.
Зарим хэрэглэгч “Телевиз авах бодолгүй байсан ч хайрцаг дээрх Dua Lipa-ийн зураг миний бодлыг өөрчилсөн” гэх мэтээр бичсэн нь дуучны дүр төрх арилжааны нөлөөтэй байсны жишээ гэж түүний тал үзжээ.
Samsung одоогоор тайлбар хийгээгүй
Одоогоор Samsung энэ хэргийн талаар албан ёсны мэдэгдэл гаргаагүй байна. Мөн компани шүүхийн ажиллагаатай холбоотой тайлбар өгөхөөс зайлсхийж байгаа гэж мэдээлжээ.
Хэргийн явцад шүүх Dua Lipa-ийн зургийг зөвшөөрөлгүй ашигласан эсэх, мөн тухайн зураг хэрэглэгчдийн худалдан авалтад нөлөөлсөн эсэхийг үнэлэх юм.
