Хүн дүрст роботуудын дэлхийн II наадам Бээжинд болно

16 улсын 2056 робот өрсөлдөнө

Бээжин хотноо энэ сарын 22-26-ны өдрүүдэд Хүн дүрст роботуудын дэлхийн II спортын наадам зохион байгуулагдах гэж байна. Энэ талаар Синхуа агентлаг мэдээлжээ.

Тус наадам тэшүүрийн “Мөсөн тууз” цэнгэлдэх хүрээлэнд болох бөгөөд оролцогч роботууд нийт 51 төрлөөр 1301 уралдаанд хүч сорих юм.

Энэ жилийн тэмцээнд 16 улсын 666 багийн 2056 робот оролцохоор төлөвлөгдсөн байна. Энэ нь өнгөрсөн жилийн наадамтай харьцуулахад оролцогч багийн тоо 138 хувиар, роботуудын тоо дөрөв дахин нэмэгдсэн үзүүлэлт юм.

Уралдаануудыг бодит орчинд ойртуулна

Зохион байгуулагчдын мэдээлснээр, энэ удаагийн тэмцээнийг зөвхөн спортын үзүүлбэр хэлбэрээр бус, бодит амьдрал, үйлдвэрлэлийн нөхцөлд ойртуулан зохион байгуулахаар төлөвлөжээ.

Уралдаан, сорилууд нь үйлдвэрлэл, ложистик, зочид буудлын үйлчилгээ, барилгын салбар зэрэг олон чиглэлийг хамрах юм.

Мөн аврах ажиллагааны хүнд нөхцөлд ашиглагдах уян манипуляторуудыг шалган туршихаар байна. Үүнд нунтаг зүйл жинлэх, хавчаараар жижиг эд зүйлсийг чимхэж авах, лонх онгойлгох зэрэг нарийн хөдөлгөөн шаардсан даалгаврууд багтжээ.

Спортын төрлүүд роботын чадварыг сорьно

Наадмын хөтөлбөрт уртын харайлт, хүндийг өргөлт, олсонд авирах, ширээний теннис зэрэг спортын төрлүүдийг мөн оруулсан байна.

Зохион байгуулах хорооны дэд дарга Зян Гуанжи-гийн хэлснээр, эдгээр төрлүүд нь хүн дүрст роботуудын бүтэц, хөдөлгөөний уялдаа, эд ангиудын бат бөх байдал, нарийн ажиллагааг шалгах хүнд сорил болох аж.

Ийм төрлийн уралдаанууд роботын зөвхөн хурд, хүчийг бус, тэнцвэр, нарийвчлал, хөдөлгөөний зохицуулалт, орчныг мэдрэх чадварыг зэрэг сорих юм.

Үйлдвэрлэлд нэвтрэх боломжийг нэмэгдүүлнэ

Зохион байгуулагчид энэ удаагийн наадам нь хүн дүрст роботын технологийг бодит үйлдвэрлэлд нэвтрүүлэх чухал алхам болно гэж үзэж байна.

Тэдний тайлбарласнаар, уралдааны талбарт шалгарсан шийдлүүд цаашид шууд үйлдвэрийн орчинд ашиглагдах боломжтой. Өөрөөр хэлбэл, спортын наадам нь технологийн үзэсгэлэн төдий бус, ирээдүйн аж үйлдвэрлэлийн туршилтын талбар болох зорилготой юм.

Техникийн стандартын суурь болох боломжтой

Наадмын үеэр боловсруулж, хэрэгжүүлэх сорилуудын дүрэм журам нь хүн дүрст роботын салбарын техникийн стандартын үндэс суурийг тавих боломжтой гэж зохион байгуулагчид үзэж байна.

Ингэснээр роботын хөдөлгөөн, аюулгүй ажиллагаа, нарийвчлал, үйлдвэрлэлийн орчинд ашиглах чадвар зэрэг үзүүлэлтийг илүү нэгдсэн шалгуураар үнэлэх нөхцөл бүрдэх юм.

Бээжинд болох энэ удаагийн наадам нь хүн дүрст роботуудын спортын өрсөлдөөнөөс гадна ирээдүйн үйлдвэрлэл, үйлчилгээ, аврах ажиллагаанд ашиглагдах технологийн чиг хандлагыг харуулах томоохон талбар болох төлөвтэй байна.