Монгол Улсын Ерөнхийлөгч У.Хүрэлсүх ХБНГУ-ын Ерөнхийлөгч Франк-Вальтер Штайнмайэрийн урилгаар аравдугаар сарын 19-22-ны өдрүүдэд төрийн айлчлал хийхээр өнөөдөр Германыг зорьжээ.
Энэ нь Монгол Улсын төрийн тэргүүний ХБНГУ-д 14 жилийн дараа хийж буй төрийн айлчлал бөгөөд Монгол, Германы боловсролын салбарын хамтын ажиллагааны 100 жилийн ойтой давхцаж байгаагаараа онцлог юм.
Айлчлалын үеэр Монгол Улсын Ерөнхийлөгч У.Хүрэлсүх болон ХБНГУ-ын Ерөнхийлөгч Франк-Вальтер Штайнмайэр нар албан ёсны хэлэлцээ хийнэ. Хоёр тал худалдаа, эдийн засаг, боловсрол, шинжлэх ухаан, соёлын салбар дахь хамтын ажиллагааг харилцан ашигтай хэлбэрээр өргөжүүлэх боломжуудын талаар санал солилцохоор төлөвлөжээ.
Стратегийн түншлэлийн дараагийн чиглэлүүдийг тодорхойлно
Айлчлалын чухал хэсгийн нэг нь “Монгол Улс, ХБНГУ хоорондын Хамтарсан тунхаглал” байгуулах явдал байна. Уг баримт бичгээр хоёр орны “Стратегийн түншлэл”-ийг цаашид бэхжүүлэх тэргүүлэх чиглэлүүдийг тодорхойлохоор төлөвлөсөн байна.
Мөн хоёр улсын Ерөнхийлөгч Берлин хотод зохион байгуулах “Чингис хаан ба Монголчуудын ертөнц” үзэсгэлэнгийн нээлтэд хамтран оролцох аж.
Төрийн айлчлалын хүрээнд эдийн засаг, шинжлэх ухаан, соёл, эрдэм шинжилгээний чиглэлийн хэд хэдэн арга хэмжээ зохион байгуулагдана. Тухайлбал “Монгол-Германы бизнес форум”, “Монгол-Германы шинжлэх ухааны өдөрлөг”, мөн “Монгол ба монголын дараах үеийн Евроази дахь соёлын солилцоо, байгаль орчин” сэдэвт олон улсын эрдэм шинжилгээний хурал болох юм.
Үүнээс гадна Монголын орчин үеийн уран зохиолын үндэслэгчдийн нэг Д.Нацагдоржийн мэндэлсний 120 жилийн ойд зориулсан олон улсын эрдэм шинжилгээний бага хурлыг зохион байгуулахаар төлөвлөжээ.
ХБНГУ-ын Ерөнхийлөгч Франк-Вальтер Штайнмайэр 2024 онд Монгол Улс, Герман хоёр дипломат харилцаа тогтоосны 50 жилийн ойн хүрээнд Монгол Улсад төрийн айлчлал хийсэн. Тухайн айлчлалын үеэр хоёр улсын харилцааг “Стратегийн түншлэл”-ийн түвшинд хүргэсэн гэж Ерөнхийлөгчийн Тамгын газраас мэдээлж байв.
Энэ удаагийн айлчлал нь хоёр улсын стратегийн түншлэлийг бодит хамтын ажиллагаагаар бататгах, худалдаа, боловсрол, шинжлэх ухаан, соёлын салбар дахь харилцаанд шинэ чиглэл тодорхойлох зорилготой байна.
Энд дурдсан айлчлалын хөтөлбөр, зорилтын мэдээлэл нь Монгол Улсын Ерөнхийлөгчийн Тамгын газрын мэдээлэлд тулгуурлав.
