Японы жүжигчин Хажимэ Окаяма 29 настай туслах найруулагч Мори Нацүмитэй гэр бүл болсон тухайгаа олон нийтэд мэдэгджээ. 62 настай Окаяма болон түүний эхнэрийн насны зөрүү 33 жил юм.
Хос аравдугаар сарын 23-нд албан ёсоор гэрлэсэн бөгөөд Окаяма энэ тухай аравдугаар сарын 28-нд Instagram хуудсаараа дамжуулан зарласан байна.
Тэрээр:
“Миний эхнэрийг Мори Нацүми гэдэг бөгөөд театрын салбарт ажилладаг. Бидний насны зөрүү нэлээд их ч хамтдаа дулаан, хайр дүүрэн гэр бүлийг бүтээхийн төлөө хичээнэ. Цаашид ч биднийг дэмжиж байгаарай гэж хүсэж байна. Одоо би урт наслах хэрэгтэй боллоо!”
хэмээн бичжээ.
Мори Нацүми насны зөрүүний талаар нээлттэй ярив
Мори Нацүми мөн өөрийн X хуудсанд нөхөртэйгөө авахуулсан зургаа нийтэлж, гэрлэсэн тухайгаа дагагчдадаа мэдээлсэн байна.
Тэрээр хүмүүс насны зөрүүг нь гайхаж болохыг ойлгож байгаагаа хэлээд:
“Бидний насны зөрүүг хараад гайхах хүмүүс байхыг би ойлгож байна. Юу тохиолдохыг хэн ч мэддэггүй болохоор амьдрал ямар санаанд оромгүй, сонирхолтой байж болохыг бид өөрсдөө ч гайхаж байна.”
гэжээ.
Түүний хэлснээр тэдний харилцааны үнэ цэнэ гял цал амьдралаас бус, хамтдаа өнгөрүүлдэг өдөр тутмын жижиг мөчүүдээс бүрддэг аж.
Мори:
“Бид уулзаж, бие биедээ татагдсан. Амьдрал урт мэт боловч үнэндээ богино. Амьдралын маш олон жижиг баяр баяслыг надад олж харахад тусалсан энэ хүнтэй цаашид ч зэрэгцэн алхахыг хүсэж байна. Бид үргэлж бие биеэ дэмжинэ. Хүмүүс биднийг сонирхон харж, ерөөлөө хайрлавал би маш их баярлана.”
хэмээн бичсэн байна.
Тайзны нэрээ өөрчлөхгүй
Гэрлэсний дараа Хажимэ Окаяма эхнэртээ “Окаяма Нацүми” гэдэг тайзны нэр ашиглахыг тоглоомоор санал болгож байжээ.
Гэсэн ч Мори Нацүми уг санааг хүлээж аваагүй бөгөөд цаашид ч өөрийн нэрээр ажиллахаа мэдэгдсэн байна.
Тэр нийтлэлийнхээ төгсгөлд нөхөртөө:
“Урт наслаарай, Хажимэ!”
гэсэн мессеж үлдээжээ.
Хажимэ Окаяма 1980-аад оноос уран бүтээлээ эхэлсэн
Хажимэ Окаяма 1964 оны дөрөвдүгээр сарын 22-нд Японы Мияги мужид төрсөн. Тэрээр 1987 онд Сатоши Сүзүкигийн байгуулсан Rappaya театрын хамтлагт элссэнээр мэргэжлийн уран бүтээлийн замналаа эхэлжээ.
Дараа нь телевиз, киноны салбарт идэвхтэй ажиллаж, NHK-ийн олон түүхэн драмд тоглосон байна. Түүний бүтээлүүдийн дунд “Genroku Ryoran”, “Komyo ga Tsuji”, “Hana Moyu”, “Onna Jōshu Naotora”, “Segodon”, “Seiten wo Tsuke”, “Berabou” зэрэг цуврал багтдаг.
Мөн “Fight”, “Hitomi”, “Teppan”, “Toto Nee-chan”, “Yell”, “Okaeri Mone”, “Anpan” зэрэг NHK-ийн өглөөний драмуудад оролцжээ.
Fuji TV-ийн “Shomuni”, “Hero” цувралуудад ч дүр бүтээж байсан бөгөөд одоо TV Tokyo сувгийн “Banshaku no Ryuugi 5” драмд Жиро Үнногийн дүрийг бүтээж байна.
