Формула-1-ийн дэлхийн долоон удаагийн аварга Lewis Hamilton Газын зурваст хүмүүнлэгийн тусламж хүргэхийн тулд Египеттэй хиллэдэг Рафах боомтыг нээхийг Израилын эрх баригчдаас шаардсан байна. Хүчтэй аадар борооны улмаас дүрвэгсдийн түр хуарангууд усанд автаж, иргэдийн амьдрах нөхцөл улам дордож байгааг тэрээр онцолжээ.
Египет дэх тусламжийн агуулахад зочлов
Hamilton арваннэгдүгээр сарын 11-ний лхагва гарагт Египетийн хойд хэсгийн Эль-Ариш хотод очсон байна. Тэрээр Египетийн Улаан хавирган сар нийгэмлэгийн агуулахтай танилцаж, Палестины иргэдэд хүргэхээр бэлтгэсэн хүнс болон бусад хэрэгцээт барааг үзжээ.
«Яг одоо Газын зурвас болон Палестины ард иргэдэд тусламж нэн шаардлагатай байна. Энэ тусламжийг тэдэнд хүргэхээс илүү чухал зүйл үгүй» хэмээн тэр цахим хуудсандаа бичсэн байна.
Мөн тусламжийн бараа хэд хэдэн агуулахад бэлэн байгаа ч хил хаалттайгаас хэрэгцээтэй хүмүүстээ хүрэхгүй байгааг шүүмжилжээ.
Эрх чөлөө, аюулгүй байдлыг нь хамгаалахыг онцолжээ
Hamilton Газын зурваст гурван жил үргэлжилсэн хүмүүнлэгийн хүнд нөхцөлийг шударга бус явдал хэмээн тодорхойлсон байна.
«Хэн ч эрх чөлөө, аюулгүй байдал, нэр төрөө эдлэх эрхээ хасуулж, амь нас нь бусдынхаас үнэ цэнгүй мэт харьцуулагдах ёсгүй» гэжээ.
Түүний мэдэгдэл бороо, үерийн улмаас орон байргүй иргэдийн нөхцөл хүндэрч, өвлийн тусламжийн хэрэгцээ нэмэгдэж буй үед гарсан байна.
150 мянга гаруй майхан нэвтрэх зөвшөөрөл хүлээж байна
НҮБ-ын мэдээллээр, хүмүүнлэгийн байгууллагууд болон гишүүн орнуудын худалдан авсан 150 мянга гаруй майхан Газын зурвасын гадна Израилын зөвшөөрлийг хүлээж байгаа аж.
НҮБ-ын хүмүүнлэгийн асуудал эрхэлсэн тэргүүн Tom Fletcher өвөлд шаардлагатай тусламжийг нэвтрүүлэх ажил Израилын шинэ засгийн газар бүрдэх асуудлаас шалтгаалан хойшилж байгааг тайлбарлажээ. Тэрээр хил нэвтрэх зөвшөөрөл олгохгүй байгааг хүлээн зөвшөөрөх боломжгүй гэж шүүмжилсэн байна.
Харин Израилын Ерөнхий сайд Benjamin Netanyahu тусламжийн нийлүүлэлтийг Израиль санаатайгаар саатуулж байгаа гэх мэдэгдлийг няцаажээ.
Эх сурвалж: Al Jazeera
