Нийслэлийн Онцгой комиссын хоёрдугаар хурал өнөөдөр зохион байгуулагдаж, улаанбурхан өвчний тархалтын нөхцөл байдал болон хэрэгжүүлж буй хариу арга хэмжээний талаар хэлэлцлээ.
2025 оны зургаадугаар сарын 20-ны өдрийн байдлаар улсын хэмжээнд улаанбурхан өвчний нийт 9,096 батлагдсан тохиолдол бүртгэгдсэн байна. Үүний 46.9 хувийг Улаанбаатар хотын иргэд эзэлж байгааг хуралдааны үеэр мэдээлэв.
Энэ талаар НЭМГ-ын дарга Х.Бат-Ирээдүй:
“Нийт 54,360 хавьтлын хүүхдээс УГУ бүрэн тунд 14,924 нь хамрагдсан. Харин дархлаажуулалтын бүрэн тун аваагүй 39,436 хүүхэд байснаас 32,042 хүүхдийг нөхөн дархлаажуулалтад хамруулаад байна. Мөн 10-14 насны 42,505 хүүхдийг дахин вакцинжуулах шаардлагатай” гэж онцоллоо.
Нийслэлийн Онцгой комиссоос дараах арга хэмжээг авч хэрэгжүүлэхээр тогтов:
Дархлаажуулалт болон тандалтын бэлэн байдлыг нэмэгдүүлэх
– Эрүүл мэндийн байгууллагуудын хүний нөөц, эмнэлгийн хэрэгслийн нөөцийг тодорхойлон шаардлагатай хөрөнгийг шийдвэрлэх.
Эрсдэлтэй орчинд хяналт тавих
– Хүүхдийн зуслан, асрамжийн газар, халамжийн төвүүдэд хяналт, шалгалт зохион байгуулж, вакцинжуулалтад бүрэн хамруулах.
Дархлаажуулалтаас хоцорсон хүүхдүүдийг бүрэн хамруулах
– 0–15 насны хүүхдүүдийн судалгааг дахин гаргаж, ирэх долдугаар сарын 10-наас өмнө дархлаажуулалтын хамрагдалтыг 95 хувьд хүргэх зорилт тавив.
Төрийн байгууллагууд улаанбурхан өвчний цаашдын тархалтыг зогсоохын тулд бүх түвшинд шуурхай, үр дүнтэй хариу арга хэмжээ авах шаардлагатай байгааг онцолж байна.
